用車報告：
Mazda2用家Storie樣靚空間夠

近年，本港不少車主都喜歡以小型RV作座駕，但大部份只愛款式，而未能領略到呢類實用小車嘅好處；而Storie就憑住萬事得Mazda2，得到無窮嘅駕駛樂趣。究竟佢對部車重有何評價？大家不妨一齊嚟睇睇。
記者、攝影：何德仁

「造型年輕有活力感……」
Storie表示，由於自己經常要來往新界及市區，故此一部充滿駕駛質感嘅汽車，可算係佢選購新車嘅指標之一；除此之外，賣相突出吸引亦屬考慮因素。「其實響買車前，我都曾經睇過同試過豐田Echo、EchoVerso、本田Jazz及萬事得Mazda2，但我個人覺得Mazda2雖然外形唔夠Jazz咁In，但勝在有齊全車包圍，望落好有跑車Feel外，而且試車後又覺得揸起上嚟好有質感，所以只係考慮咗兩個星期，就買咗呢部Mazda2做座駕喇！」Storie說。

「視野廣闊又夠力……」
「至於駕駛感覺方面，我會覺得Mazda2闊大車窗配搭，能令視野範圍變得廣闊，加上睇位又容易，無論係日常行車又或者係倒後泊位，都來得輕鬆又方便；而佢嗰台1.5公升直4偈，夠晒慳油寧靜之餘，最緊要係可有充裕嘅動力輸出，匹配一套4前速自動波，日常行車順滑流暢外，就算響高速公路上要切線爬頭或加速，都可應付自如㗎！」Storie笑着說。

「寬敞空間坐得舒適……」
「可能我自己比較高啦！所以響試駕Jazz嗰陣，就有頂腳嘅情況出現，而後座空間亦唔及Mazda2咁闊落；至於座椅嘅承托力及乘坐舒適度亦來得較其他車款高，喺有需要嗰陣我重可以將後排椅背收摺放平，以增加尾廂載物容量，真係方便又易用㗎！」Storie笑着說。另一方面，佢又認為中控台上設備齊全，而銀色面板配搭亦見有一份吸引性，最緊要重係車內設有不少儲物匣，方便擺放雜物呢！

「隔音略嫌美中不足……」
Storie雖然對座駕評價甚高，但仍略嫌車子隔音稍差，當高速行車時，傳入車廂嘅風聲會較多，廠方或許應改善一下；而過彎時亦見車身傾幅較大，但仍未予人不安嘅感覺。

萬事得Mazda2小資料
當年憑着一款Demio，而在本港成為迷你RV市場領導者嘅萬事得，於去年底由代理引入新一代型號，並易名為Mazda2（但日本版仍稱為Demio）；新車無論造型，抑或係車廂配搭，都予人一份年輕活力感，而頂級版一台1.5公升直4DOHC引擎，亦能做到既慳油又好力嘅表現。另外，代理方面為吸引買家，更於最近為Mazda2推出多項配件，務求讓車主可為座駕粉飾一番呢！

規格
引擎：1498cc直4DOHC
馬力：113ps/6000rpm
扭力：14.3kgm/4000rpm
尺碼：3925×1680×1555mm
軸距：2492mm
車重：1111kg
新車售價：$109,900
查詢：萬事得汽車（28931112）

用家大募集
如果你係車主，而座駕又已落地三個月或以上，無論對座駕是讚是彈，我哋都願意將你嘅心聲寫成《用車報告》，與廣大讀者分享；有興趣嘅朋友，可利用以下方法同我哋聯絡。
傳真：27420542
電郵：[email protected]
郵寄：香港將軍澳工業邨西駿盈街八號《蘋果日報》副刊「用車報告」收
（請註明姓名、年齡、聯絡方法及車輛型號）