繼唐英年上星期喺北京見唐家璇，嚟一個「雙唐」會之後，噚日再有一個「雙曾」會，主角就係「曾主席」曾鈺成同「曾副主席」曾慶紅。
可能會見「同宗」挑起民建聯嘅曾主席條根，噚日佢喺同國家副主席曾慶紅會面前大講曾氏家族族譜，佢話曾氏一族同孔、孟、顏三族一樣，族譜係跟「超、憲、慶、繁、祥」去排，再之後係「令」同「德」，所以香港嘅曾憲梓、曾繁光、孔令成、孔祥勉等人，個名相信都係跟住咁排落去。
曾主席記得自己係屬於繁字輩，所以自己咁「煩」喎。不過族譜並非得個睇字，曾主席話選舉做家訪時，小型曾氏家族宗親表最有用，講得白啲，認親認戚容易啲嘛。
講開曾主席，八方行家噚日朝早喺北京都同佢玩咗一朝捉迷藏，事關民建聯訪京團噚日朝早冇事做自由活動，曾主席就話約咗朋友見面，又唔肯講呢位朋友係咪港澳辦主任廖暉，只係話見廖主任唔一定要上北京。
結果八方行家一大清早走去佢酒店港澳中心等佢，等極都等唔到，有人後來話見到佢同譚耀宗一齊離開，於是大家以九秒九速度勁跑追佢九條街，終於見到兩個男人拍住拖咁喺樹蔭路上散步，激死。俾八方行家死纏之下，佢乖乖同大家一齊飲早茶，去到酒樓重咁啱被帶位小姐安排坐入「中環」廳，去到北京都離唔開中環㖭。
傳真︰2623-9278
電郵︰