哥哥（張國榮）拍過《神鵰俠侶》扮過楊過？姑姑係邊個？更估唔到！竟然係𠵱家攞咗律師牌嘅翁靜晶！小記所講嘅係邵氏經典舊片《楊過與小龍女》，今個星期新出咗DVD；想一睹哥哥20年前嘅後生靚仔樣？今個星期絕對必買！如果係LeslieFans，更屬必搶！
記者、攝影：朱崇德 鳴謝：樂悠網
逢星期日出版
相信好多張國榮《H2O》Fans，都重未聽過佢曾經飾演過楊過一角；今次透過天映娛樂作數碼修復的邵氏名片，先知哥哥曾拍這套《楊過與小龍女》，1983年的作品，年期大概是在青春經典劇《喝采》及《檸檬可樂》之後！
講到《神鵰俠侶》，好多人都覺得劉德華同陳玉蓮所拍嘅電視版係經典，不過睇過呢套《楊過與小龍女》，你會發覺不論場景及攞鏡，感覺同電視劇都好相似，尤其是終南山的重陽宮同古墓後的練玉女心經花叢，更覺電視有從此電影中偷橋！
論選角，哥哥做楊過亦不比劉德華遜色，張的反叛性格，的確有點年輕時楊過的味道，而且加上初出道時的後生靚仔樣，雖然演技尚算幼嫩，都一樣演得入木三分；至於小龍女一角，則由當年年輕貌美的翁靜晶飾演，老電視迷可能記得，當時翁的人氣度極高，做小龍女一角，有星味樣貌身材又夠索，真係有幾分出塵的「龍女」Feel，不過自此劇後，翁便在84年與當時邵氏名導演劉家良結婚，所以都可算係佢退出娛樂圈嘅代表作。
哥哥同小龍女花叢練功，比重陽宮尹志平撞破，哥哥衫都着唔切趕住走；這絕對是哥哥早年少有的露兩點之作，而且望落都幾大隻，不過佢下身包住條布，可能打底太厚，包到成個阿差咁款，好搞鬼！
故事早段編排唔錯，不過後半部刪改太多，例如冇咗絕情谷一段勁離譜；不過最過份係楊過冇斷手，竟然重好似《皇者之劍》嘅阿諾咁，用雙手揸玄鐵劍！冇法啦！哥哥斷手重點靚仔呢？
有睇金庸原著嘅都知，神鵰功夫勁了得，楊過嘅一身獨孤九劍都係由佢教，不過唯一可惜就係唔識飛！哥哥喺劇中竟然可騎上鵰背玩合體攻擊，相信查大俠都估唔到神鵰打到曉飛！
今個星期真係興懷舊，王晶至經典嘅《精裝追女仔》，終於推出DVD；此片至勁之處，係由佢帶動咗一系列追女仔片嘅潮流，最經典一幕係講劉定堅（馮淬帆飾）扮智障兒童，詐癲納福。其他演員還包括有周潤發、張曼玉、曾志偉同陳百祥，絕對粒粒巨星，可以算得上追女仔片中極品之作。
《千機變》戲院剛落畫冇耐，咁快又話出DVD，TwinsFans又係必買啦！套戲當時影評唔錯，今次DVD嘅銷情好多舖頭都話幾睇好，尤其隻《千機變珍藏版雙DVD》最令人期待，話明全球限量發行3,000套（每套均印有獨立編號），就更加搶手，裏面會多送殭屍獵人寶劍一把，同鍾欣桐、蔡卓妍、鄭伊健、陳冠希親筆簽名劇照相片一套四張；不過聽一啲DVD舖講，隻珍藏版好難攞貨，要搵都唔係咁易，究竟邊間有？之唔係旺角近亞皆老街嗰兩間DVD舖囉！
《特務戇J》在戲院上畫時反應一般，但估唔到反而出DVD就幾好收，出咗成兩個星期，銷量不降反升。第二位嘅《我愛發脾四》都算新片，故事講主角戴夫平時做人「陰聲細氣」，但經過一次跟人口角後，被送到憤怒治療師診所接受觀察，並教他平衡憤怒心理，𠵱家香港社會、經濟咁差，最啱睇嚟學控制情緒。
另外，要掃平貨嘅人要留意，最近洲立推咗批近百隻舊片出嚟做特價，正片如狄美摩亞嘅《伴我雄心》，同勁驚嚇嘅《十字狂魔》等，全部都係$18，好抵。
第一位《特務戇J》
第二位《我愛發脾四》
第三位《魔戒二部曲：雙城奇謀》
第四位《同盜一擊》
第五位《獵網》
資料提供：DVDPRO