大馬路嘅相熟報紙檔檔主，相當好傾，亦識做生意，往往做到成晚上八點先至收工，夠晒勤力。佢收檔之際，左丁山先至放工經過，於是又多口問佢：「《東周刊》復刊賣成點呀！」檔主話：「攞咗85本，賣剩25本。」咁，《壹週刊》又如何？檔主騎騎笑：「壹仔唔使我向客仔推銷嘅，每期分到185本，想問發行攞多啲都冇，期期賣晒。呢，今日下晝收到啲書，眨吓眼就去咗100本，聽日應該冇貨賣嘞。」
檔主為咗賺多個錢，向熟客介紹東周，理由好簡單，既然周刊有市場，而壹仔每期只分到唔夠兩百本，如果東周賣得嘅話，佢可以賺多啲喇喂。再問檔主：「其他同類周刊賣成點？」檔主冇厘好氣：「推極都唔會多郁㗎嘞，慳番啖氣好過。」哦，故此為咗多賺幾蚊，咪推銷吓囉。
幫佢買完壹仔，又買東仔，返屋企食完飯，打開四本書，一陣就睇完。兩本雜誌，基本上完全一樣，冇分別。好難怪嘅，東周高層，全部在壹仔做過，大家都係來自一個桐油埕，點會有新奇招數吖。認真考究啲講，東記刊新埋班，論文字結構組織，重未及壹仔呢架自動機器咁順暢，不過如果壹仔輕敵，東記就有機可乘嘞。另一樣嘢有趣嘅，就係東記傾向政府，壹仔傾向反董，自不然反映咗兩位大老闆嘅政治取向。以後讀者嘅選擇可算係民意調查。