陳文媛（BoBo）在電視劇《戀愛自由式》中飾演的「Busy姐」，戀上蕭正楠所扮演的「落湯雞」，但BoBo坦言對蕭正楠沒有feel，相反一提到緋聞男友陳冠希（Edison）早前盛傳與鍾欣桐及趙頌茹拍拖時，BoBo則極力維護Edison，更認為大家都清楚遊戲規則。
陳文媛與陳冠希這兩個人的名字總是分不開，不過BoBo的緋聞男友由始至終都只得一個Edison，相反Edison的緋聞情人卻多籮籮，早前他先後與鍾欣桐（阿嬌）及趙頌茹（阿Yu）鬧緋聞，結果BoBo與阿嬌及阿Yu變成情敵，直至上周BoBo又戴上一條E字頸鏈現身，於是又有人猜測她在Edison心中的地位其實穩如泰山。
BoBo日前在銅鑼灣接受訪問，揚言習慣緋聞的她一臉從容自若地說：「啲人攞嚟講啫，呢行啲人着嘅衫呀、鞋呀，成日都撞㗎啦，啲trendy嘢個個都會有。」不過盛傳BoBo平日所穿的服飾大都是Edison所送，對此她說：「Sorry，我有做嘢，自己賺錢㗎，啲人鍾意點諗就點諗，愈解釋愈無聊。」
對於她與Edison、阿Yu及阿嬌的四角緋聞，BoBo說：「我同佢（Edison）由頭到尾都係朋友，由得啲人去諗囉，做乜要刻意解釋啫，我屋企同朋友嘅嘢，唔使交代㗎，𠵱家做嘢緊要啲，唔想講兒女私情，𠵱家係搏殺期，流言嘅嘢我阻止唔到，我都係嗰句啦，唔想解釋咁多，你信就信，唔信就算。」
難道她與Edison已有共識？BoBo說：「大家做呢行會明白，唔需要有乜共識，大家知遊戲規則，唔好攞呢啲嚟講啦，雖然啲人係咁講，但我唔會尷尬，亦唔會因為咁而唔敢同佢講嘢，當然亦都唔會專登走去傾偈，見到咪傾，見唔到咪唔傾囉，好多嘢係大家太敏感，我入行以嚟，都習慣咗呢樣嘢（緋聞），點解唔可以大大方方？愈尷尬就愈有問題。」
BoBo對Edison或許不尷尬，但面對阿嬌及阿Yu又如何？BoBo說：「冇乜嘢㗎，我同阿嬌唔係好熟，我都識阿Yu，等啲人講囉，我自己見到佢哋就冇嘢，做好自己嘢就夠。」
那麼Edison是否她心目中的男朋友人選？BoBo聞言即時笑到「見牙唔見眼」，她笑說：「我又冇特別諗心目中嘅男朋友要係點點點，要有乜嘢條件，我嘅男朋友要有五呎十一吋高，如果唔係就唔鍾意，我又唔會咁樣，我相信緣份。」
雖然BoBo一直避談Edison，但言語間也感到她維護雙方的關係，不過對於另一位「情人」蕭正楠，BoBo的態度便截然不同。
BoBo在早前播出的劇集《戀愛自由式》中飾演的「Busy姐」，暗戀蕭正楠扮演的「落湯雞」，但BoBo坦言對蕭正楠完全沒有feel，問她在拍劇其間有沒有與蕭正楠戲假情真？她即搖頭說：「拍戲就拍戲，唔會有呢啲感覺，拍戲係要投入角色……可能我未到呢個level啦。」其實蕭正楠是否提不起BoBo的興趣？她聞言不禁笑得人仰馬翻，並說：「唔知，冇呢種感覺。」
此外，BoBo昨日到將軍澳出席「開心親子顯顏色」活動，被問到Edison因出唱片有阻滯而不開心時，BoBo說：「我知佢今年只係出過一隻碟，不過呢啲始終都係佢同公司嘅問題，其他人就唔應該畀意見，大家亦都唔好諗咁多嘢。」問BoBo有否就此事安慰Edison，她說：「佢入行耐過我，所以佢應該會明白，唔需要安慰啦，佢份人亦都好樂觀，而且佢都有好多工作喺手。」
BoBo透露早前接拍的電影《咒樂園》亦有請白龍王參與開鏡儀式，她說：「白龍王叫我唔好成日發脾氣。」當記者指白龍王亦向Edison說同一番說話時，BoBo即笑說：「唔係呀？佢係叫我唔好發阿媽脾氣，咁個人心平氣和啲就自然有好運行。」
撰文：朱芷瑩
攝影：仇志德
服裝：SistyrMoon
化妝：Kamen
髮型：Calvin（KenQi）
