財政司司長唐英年近排忙到飛起，星期一本來要飛去廈門陪特首參加「中國投資貿易洽談會」開幕禮，但係忽然改為飛去成半個地球咁遠，到墨西哥坎昆參加世貿組織第五次部長級會議。
呢次部長級會議本來只由工商及科技局局長曾俊華代表香港，今次加料到「雙部長」，唐英年嘅身份好特別，佢接受身兼大會主席的墨西哥外交部長德爾貝邀請，以「主席朋友」身份出席大會，主持一輪非共農產品市場準入會議，幫手協調各方意見。
港府談判專家同八方講，呢類國際談判，香港代表都好有用，因為同發展中及已發展國家都有偈傾，上次「多哈回合」搞得掂，香港常駐日內瓦代表夏秉純功勞唔少，後來重俾世貿總幹事素帕猜挖角，家陣負責最棘手嘅農業問題談判。
唐司長咁忙，噚日自己生日都要喺上午出席電台節目，匆匆返到辦公室，午飯過後就先有私人時間，同事忙到只得閒送張賀卡。
傳真︰2623-9278
電郵︰