歐洲國家盃外圍賽噚晚踢完，當中有十五場賽事亦係馬會足智彩接受投注場次，而且將英格蘭同意大利等四場列為重點球賽。不過，我求大俠睇番賠率一直都無大變動，可能因為太熱所致。
其實，英格蘭對住馬其頓，荷蘭對奧地利，甚至意大利對威爾斯，都屬於強弱分明賽事，強隊贏波賠率熱到燙手，亦屬合理，但係太熱又叫投注人士點買得落手？投注弱隊一邊？又始終連和波機會都不大，博冷W更加唔使諗。
所以我求大俠到噚日五、六點，見到呢幾隊W賠率，同上星期四剛接受投注時一樣。就係因為呢類賽事，先至出現亞洲盤讓球玩法，話晒有輸波贏盤呢種情況，增加吸引性。馬會，你識做啦！
阿仙奴嘅英格蘭後衞蘇甘保由於十分姿整，而且練到周身肌肉，有傳佢係同性戀者。之但係，呢啲傳聞原來係假，事關蘇甘保女友塔茲明出嚟澄清，話蘇甘保係百分百嘅男子漢。其實，好多球員都好大隻同好姿整，例如係皇馬嘅葡萄牙中場費高，唔通佢哋統統鍾意男人咩！
曼城領隊基瑾早排講過，佢哋中場太過多人，故新加盟嘅「老麥」麥馬拿文唔一定做硬正選，但轉過頭，佢又話「老麥」有資格返英格蘭國家隊。我求大俠認為講多無謂，行動最實際，如果基瑾佢有心支持「老麥」返國家隊，就畀「老麥」多啲落場機會，咪一味得個講字。
因為唔識講西班牙文而俾人棄用嘅巴塞土耳其門將魯斯度，終於忍唔住口話教練列卡特，重話足球就係全球性語言，球員可用足球嚟溝通。佢咁唔高興立即引起母會費倫巴治注意，有意明年一月攞番佢；如果成事，佢由去巴塞做救星，最後因為咁而離隊，一定成為球壇笑話。
米高佐敦噚日拒絕咗夏洛特山貓嘅老闆兼好友羅拔莊遜嘅邀請，因為波神講明一定要自己做大老細，全部嘢都要話晒事，其他角色一概免問！睇嚟波神吸取咗上次做巫師小股東，但最後俾大老細突然炒魷嘅教訓，所以今次打死都要做一哥，費事又俾人「打完齋唔要和尚」喇！