港股真係好似愈升愈有，不過來到呢啲位，再叫啲客仔入市追貨真係好難，上個禮拜五好多之前急升嘅股仔都收斂晒，可見唔少散戶都唔係咁睇好呢排升到過咗火嘅股仔。
不過有朋友話，雖然個市未必會再去，但喺熱錢充斥下，啲股仔重有排癲，下一個焦點將放喺同李超人相關嘅股份身上，皆因佢哋嗰系一向都係散戶同土砲芬佬嘅至愛。有專炒超人系股份嘅朋友叫留意吓隻長江生命科技（8222），皆因個市開始又炒番啲生物科技嘅股仔，加上之前佢哋同母公司簽訂供貨協議後，話好快會有新搞作，好似係同本地某名牌大學合作開始有成果。上星期隻股突破1.9元後成交勁升，十足十突破格局，若然炒上嚟，分分鐘去番2.2元水平。
行家又話，啱啱用1.1元批一億五舊股嘅中聯系統（757），如果今個星期復牌，而又肯跌番落去批股價附近嘅話，就一定要留意吓。今次批股批得咁急，其實都喺市場預期之內，皆因3位大股東股權加埋已經令到市場流通量少過交易所嘅流通要求，而和黃（013）同星展今次入股做大股東，其實都幾無奈，據聞中聯之前向兩位新大股東發行咗一筆可換股債券，由於無辦法如期還款，兩位新股東惟有悉數換晒做正股，重無端端做埋大股東㖭。不過由於和黃霍大班喺換股後被選入董事局重做埋主席，市場就將和黃入股嘅消息當做正面消息咁嚟炒，個行家估計，佢哋可能重要批股，個價繼續被推高都唔定。
伏勝