李連杰近年醉心佛學，佢噚日喺台灣同記者講話五年前開始學佛，佢每拍完一套戲，就習慣要閉關兩個禮拜，無論套戲嘅票房好同壞都唔會影響佢嘅心情，亦因為要研究佛法，佢推咗今年下半年兩套荷李活電影，賺少一千八百萬美金（約一億四千萬港元）。
上個月李連杰去咗青海七日，喺當地學咗「往生法」，即體會死亡嘅一刻，但有人話學「往生法」係會減壽，問李連杰係咪真係唔介意減壽，佢話唔緊要，密宗有一種增壽法，佢可以再修喎！
李連杰又話自己細個時屋企好窮，所以賺嘅錢會全部交畀阿媽，𠵱家搵嘅錢就交晒畀老婆，所以佢呢一世都唔使為錢銀煩惱。李連杰噚日就結束成個台灣求法之旅，去下一個佛法聖地印度。
莫文蔚（Karen）咁大個女原來從未浸過溫泉，呢件事俾佢嘅台灣好姊妹陶晶瑩（陶子）知道咗，咁梗係要帶佢去試吓，順便影埋做節目啦。Karen獻出咗佢嘅處女「泡湯」，一落水嗰吓感覺好神奇，覺得全身嘅毛孔突然打開晒，佢同陶子一路浸，一路飲清酒，不停話「好爽」，Karen重笑住話咁嘅工作最好安排佢做多幾次喎！
楊千嬅噚日喺深圳宣傳電影《安娜與武林》，有傳聞話鄭伊健因為之前拍電影《炮製女朋友》同《又又雄》都唔收得，所以導演葉偉民將戲份加晒畀千嬅，佢話：「冇咁嘅事，因為呢套戲都冇劇本，次次要到現場先知拍乜。」伊健就力撐自己噚日本來冇戲份，但反而加咗，所以傳聞嘅嘢都唔知信邊個先真。
代理手袋品牌LeSportsac嘅康虞茱迪前日同弟婦鄭文雅去咗銅鑼灣，推介一系列LeSportsac新款限量手提袋。鄭文雅以低胸裙亮相，問佢怕唔怕走光？佢話：「唔怕，着咗泳衣打底。以前為咗有party去先買靚衫，𠵱家唔會啦，鍾意買就買。重有，𠵱家同朋友傾嘅話題，係邊個朋友有病，要睇乜嘢醫生，所以要及時行樂同扮靚。」
Boy'Z成員關智斌（Kenny）前日發燒入院，噚晚已經退咗燒，本來醫生建議佢最好休息多一晚。不過，Kenny話今日一早有嘢做，佢唔想影響工作，所以噚晚七點半左右就由助手陪佢出院。
而Kenny爸爸本來返咗內地旅行，都即刻趕返香港照顧個仔。
