港股噚日又有31點進帳，恒指收11170，不過成交就縮至125億元，成交動力已見減弱，可能因為呢一兩日零售股持續急跌，開始影響散戶心情。
黑客話，散戶開始轉趨觀望，噚日買貨確係審慎咗，不過佢哋重未捨得離開部大利市機，仍然不停爭住㩒機睇股價，但就冇乜落order。
恒指雖升，但唔少藍籌股回吐，大市主要由中移動（941）及中海油（883）力撐，唔少專家都話大市要調整，不過阿虎收到來自遠方ICQ英哥嘅消息話，美國投資情緒開始轉好，期指大戶唔會咁輕易畀港股調整，隨時托多一兩日就挾淡倉，一於升到你唔信。
中聯系統（757）突然停牌，市場早就料到和黃（013）及星展需要減持中聯，以維持最低公眾持股量達25%。和黃及星展合共配售0.95－1.5億股出街，每股作價1.10元。和黃與星展投資於中聯之成本價約為每股0.30元，現以每股1.10元出售，即每股賺0.80元，認真和味。據聞今次配售股份，主要配畀友好芬佬坐盤，即係意味復牌後，重可以繼續乾炒。
近日港股成交大增，資金開始追捧證券經紀公司，其中萬能國際（305）勁升61.8%，收0.11元。據聞萬能國際一早有意放盤。不過，香港當時衰嘢一浪接一浪，港股成交與氣氛又差，就算有心進行併購嘅中型行都持觀望態度，不敢輕舉妄動，但𠵱家就可能有偈傾。
阿 虎