徐若瑄之前分別同周杰倫、吳建豪傳緋聞，又俾人話佢介入「雙J戀」，即係Jay（周杰倫）同Jolin（蔡依林）之戀。呢單四角戀可謂峯迴路轉，馮仁昭聽個喺台灣娛樂圈做幕後嘅老友講，話呢單戀聞傳得最勁嗰陣，徐若瑄的確同吳建豪發展地下情，當時佢兩個身邊嘅朋友都知佢哋拍緊拖，點知後嚟吳建豪嚟咗香港拍《少年阿虎》，兩個人異地相隔，徐若瑄又忙於拍台劇《狂愛龍捲風》，兩個就少咗聯絡。
同一時間，喺台灣嘅周杰倫不時約會徐若瑄，喺周杰倫搶攻一輪之後，卒之反敗為勝，同徐若瑄行得好埋，但原來同徐若瑄一齊拍戲嘅朱孝天亦喺呢個時候對佢展開追求，正所謂近水樓台，日日拍戲都對住，徐若瑄就咁周旋喺周杰倫同朱孝天之間，佢重同朋友訴說感情煩惱，話𠵱家同周杰倫未穩定嘅時候，朱孝天又發力追佢，突然間咁多男仔喺佢身邊出現，又亂又煩喎！
鄧健泓噚日喺新城接受節目《一個靚墟》訪問，佢自爆女朋友原子鏸早幾晚喺銅鑼灣撞車，好彩人冇事，而當女友打畀佢嗰陣，佢正喺TVB拍緊嘢，但仍然即刻趕去現場了解情況，結果原子鏸賠咗千幾蚊畀對方解決咗件事，鄧健泓覺得女友只係唔小心同失魂，對女友嘅技術都重好有信心。
朱茵、吳鎮宇同張家輝前晚出席《心寒》首映，朱茵着咗件開胸衫，諗住解開少少畀大家欣賞吓佢入面着嘅豹紋Bra時，張家輝竟然走去昅佢，昅完重要笑，好在佢男友黃貫中唔喺度，唔係真係分分鐘會大打出手。而《心寒》喺前日上畫，首日票房只得九萬，成績認真麻麻。
余文樂噚日喺新城電台接受訪問，佢話今日出碟，所以會去買番隻碟畀自己，問到佢會唔會買隻畀阿嬌，佢話：「佢哋都出碟，見到面都會送。我有時間會去買佢哋隻碟，大家互相欣賞學習吓。」講到之前有指阿樂批評阿嬌嘅衣着，佢話：「我真係冇講過，屈得就屈，我要解釋番，咁樣會有好多誤會。」
前日係靚靚袁詠儀三十二歲生日，晚上佢同屋企人、男友張智霖喺跑馬地一間餐廳慶祝生日，好友邱淑貞同老公沈嘉偉都有出席。靚靚話𠵱家自己成熟咗，上年開始已經冇大搞生日party，只係靜靜咁同父母、男朋友一齊過，佢噚日就飛咗去上海做嘢，始終搵錢緊要吖嘛。
英國滾石樂隊原定今年四月喺內地嘅北京同上海舉行兩場演唱會，不過最終因為沙士而臨時取消，不過最新消息滾石樂隊好有機會訪京。籌備單位嘅負責人表示演唱會計劃十一月十四日喺可以容納一萬八千人嘅北京首都體育館舉行，滾石樂隊亦有可能去上海演出。
