兩個都係上季俾人捧上天嘅後起之秀，列斯前鋒米拿嘅發展同愛華頓新星朗尼比較，可以話差天共地。正當朗尼喺國家隊挑戰幾個師兄嘅正選位置時，突然傳來列斯外借米拿去英乙聯球會史雲頓，為期一個月。
列斯今夏招攬好幾個短期僱傭兵幫助護級，誓估唔到竟將被公認為未來希望嘅米拿外借，呢個舉動都咪話唔令人費解。再講，我求大俠覺得一係唔借，決定借就索性借長啲，一個月時間喎，米拿仔去到新球會需時適應，啱啱坐暖個位之後又即刻要回巢，好難達到學習效果喎。到底列斯會方諗緊咩呢？
歐洲大會同啲球員合約不嬲都立立亂，話說巴塞一直想同兩個球員門將保蘭奴及前鋒丹尼解約，所以今屆已經冇同佢哋註冊，但係佢哋竟然賴死唔走，搞到巴塞冇晒符。我求大俠就話，兩位仁兄不如走吧啦，咁大個人有番啲骨氣好，東家唔打打西家，況且佢哋都係有料之人！
李華度喺AC米蘭發展唔如意，平時對意國傳媒最多都係講啲行貨說話。正所謂鬱咗咁耐，返到南美地頭重唔暢所欲言咩。日前佢就向巴西傳媒大吐苦水，話AC教練安察洛堤唔信任佢，令佢好冇癮。AC會方喺巴西咁多線，李華度小心被秋後算帳喎。
意大利聯賽會仍然未能夠說服各意乙隊取消杯葛行動，不過光頭會長加利安尼同委員開過無數次會後終決定唔再等嘞，鐵定意乙響嚟緊禮拜日開波，邊隊唔落場就當輸○比三，無得傾。意乙球會怨氣沖天，就算今次用強硬手段過到骨，從此都會麻煩多多，光頭佬有排頭痕。
雖然轉會市場已經關閉，但最近重有唔少自由身球員轉會消息，例如前法國國腳巴亞就獲保頓提供三個月短期合約，踢得好至會同佢續約。數吓數吓，巴亞都跟保頓操咗個幾月，據講佢響熱身賽踢得唔錯，估唔到咁辛苦只係博到張短期飯票，都咪話唔悲哀，真係世界難撈。