大市係都唔肯跌，大超買藍籌如長實（001）、和黃（013）同新地（016）等，係咁意回一兩格，有心人舞住隻中移動（941），再將滙豐（005）頂高一格，恒指又升31點，再創新高。所以話，暫時都咪掂啲Put輪。
中移動是日頂住個市，升近2%，收報21.30元，向上應該重有多少水位。昨日推介兩件中移動Call輪9861同9846，均約有9%進帳，不妨揸多陣。
重磅藍籌郁完中移動，如果個市要踢上去，下一隻可能輪到郁滙豐，相關Call輪要望多兩眼。
滙豐Call輪始終鍾意9845，今年12月2日到期，現價75仙，溢價0.99%，1個巴仙唔到，槓桿率13.5倍，一啲都唔失禮，而且成交夠旺，上車落車好容易。
冷門股中策（235）是日成交40萬元，股價收報20.6仙，僅升1.5%，但佢件公司輪1216就由4.5仙彈上5.9仙，大升31%，霸咗龍虎榜頭位。純以數據論，1216唔值博，今年12月尾到期，溢價6.3%唔算太離譜，但3.5倍槓桿率就唔得吸引，而且成交好奀，買賣隨時跳幾個價。
當然，隻輪嘅輪價細，升跌幅度好易誇張，未來一段日子，相信不時都會喺升跌龍虎榜見到佢。
章盛