林敏俐將於下周三回美國繼續學業，一眾好友前晚替她餞別，其中左慧琪更送上自己設計的心形鏈墜和頸鏈，鏈墜可拆開，一人戴一半，就如情侶鏈，林敏俐表示為免傷感，已要求左慧琪不要去送機。
剛卸任的港姐冠軍林敏俐，將於下周三（十日）返回美國讀書。前晚一眾好友左慧琪、嘉碧儀、鐘子淇等以及幕後工作人員在銅鑼灣時代廣場一間餐廳替林敏俐餞行，好友紛紛送上禮物，其中以左慧琪所送的心形鏈墜和頸鏈最有心思。
該鏈墜和頸鏈是由左慧琪自己設計，然後拿去訂做，心形鏈墜可以拆開，左慧琪和林敏俐一人戴一半，而且鏈墜上互相刻了對方的名字，就如情侶鏈一樣，可見左慧琪和林敏俐感情要好程度。
林敏俐表示收到左慧琪的禮物感到十分開心，她說：「我唔係注重物質嘅人，我覺得送禮物最緊要講心意，今日我總共收到三條鏈，而我戴住嘅耳環係左慧琪父母送畀我嘅，我真係好感動，好唔捨得香港嘅朋友。」
林敏俐更叮囑左慧琪當日千萬不要去送機，她說：「我想靜靜咁走，唔想經歷太傷感嘅場面，所以叫咗左慧琪唔好嚟送機，佢送完就話走啫，但係我一個人上咗機，喊又唔係，唔喊又唔係，會好心噏，我希望以後可以多啲返嚟香港，因為喺呢度一年，識咗好多朋友。」
左慧琪亦表示還未決定是否會去英國繼續讀書，她說：「我想留喺香港，我嘅情況同林敏俐唔同，佢屋企人喺美國，但我屋企人全部喺香港，父母叫我自己決定。」
採訪、攝影：卓寶花