九月二日本欄講南加大猛人，提到大前研一（KenichiOhmae），竟然寫成大前健一（KeinichiOhmae），鎖你鎖你。內亦有提到麥肯錫報告，交咗畀董特首，「如泥牛入海」！
Y總監每日睇住《蘋果》，晨早就打電話嚟：「喂，小左，你話份報告到咗董生手上，如泥牛入海，證明你冇乜政府線路。嗱，話你知，董生睇完報告，聽講非常歡喜，已經向有關局長傳閱。《金融時報》老總訪港見董生，亦提起呢份報告，《金融時報》會發表報告撮要，你留心睇呀！咪又話人家唔理！」
哦，睇又有乜用？有冇action先？Y總監叫左丁山少安無躁，總會等到有料到。董先生為人謹慎，喜歡左聽右聽，我哋不妨又等吓。
麥肯錫嘅副董事馮玉麟博士喺九月二號上新城財經台，講呢份麥肯錫報告，介紹得幾清楚，口齒十分伶俐。呢位博士原來係香港尖子，中學讀聖保羅男女，大學讀牛津（歷史系），研究院讀哈佛（歷史與東亞語言），九十年代搞博士論文寫「中國民主化進程」之類嘅題目，曾經在布朗（Brown）大學教過中國歷史與政治，來頭好猛。馮博士有份參與「重建香港競爭力研究」嘅工作，現在專注於香港與台灣嘅顧問生意。麥肯錫專請讀書尖子，入去做過都怕可以噏幾年。W教授位公子喺中大畢業（BBA），直入麥肯錫都算硬嘢，唔怪得佢一提起就四萬咁口。