可能噚日係星期五嘅關係，又或者係港股先前已經炒得過龍，所以成交明顯縮番，只有125億元。部份股仔亦冇之前炒得咁爽手，但膽生毛嘅經紀陳話，咁樣反而係提供一個入貨機會。
經紀陳話，如果夠膽跟大陸炒家炒一鋪嘅話，可以考慮大陸電訊科技股，其中有已經公布業績好靚仔嘅長城科技（074），同埋新簇簇上市無耐，就快公布業績嘅京信通信（2342）。
長城科技喺上個月底，公布截至6月止中期業績，盈利有成6692萬元人民幣，比起去年同期上升1.1倍，自此之後，股價一直上升，噚日又斬四両，升多9.77%，收1.91元。
京信自從在7月中上市以來，從未令捧場客失望過，隻股招股價1.88元，但上市以來，最低只係試過2.025元，可見走勢異常硬淨，最近京信股價又見異動，皆因即將在下周二公布中期業績，噚日再升5.1%，再創3.60元新高。
經紀陳話，京信咁新淨，業績通常唔會差，加上股價企得咁硬，可以跟入短炒一轉。
慕容小初