立法會議員兼前綫召集人劉慧卿由台返港後日日俾左派圍剿，竟然無限上綱到話：卿姐話尊重台灣人嘅意願，就等於支持台獨，就等於違反擁護《基本法》嘅誓言，所以民建聯嘅陳雲生要求警方查吓卿姐有冇發假誓，有人又去信立法會主席范徐麗泰投訴，總之就令人大開眼界。唔知係咪「精人出口，笨人出手」，竟有潑糞黨向卿姐嘅地區辦事處淋屎，但冇任何留言。
八方問卿姐得罪咗何方神聖？卿姐話唔知，但係都開始有啲擔心，要求警方徹查。聽聞曾一哥亦覺得事態嚴重，已經下令喺附近加強巡邏，以免潑糞黨搞到全城臭晒，倒佢大佬清潔大隊長嘅米。至於有冇暗中保護卿姐，八方就唔知。
其實卿姐成日周圍走，警方都幾頭大，今日佢又去港台出席《政黨論壇》，本來講台港關係，後嚟臨時改題目講撤回23條，八方問港台係咪怕俾人潑屎，佢哋梗係話唔係，重話理性討論使乜驚。
至於立法會，范太已經話咗主席要中立，不受理投訴，要理都係「飛天朱」朱幼麟個「議員個人利益監察委員會」理，不過委員會連黃宜弘隻中指都冇符，點管卿姐嘅言論自由？
差啲唔記得幫警隊鄧厚江總警司澄清，絕冇將民建聯嘅投訴交重案組處理；不過潑屎屬滋擾性質，乃刑事罪行，一定會嚴肅處理。
傳真︰2623-9278
電郵︰