梅艷芳昨日得一班好友支持，陪她出席記者會交代病況，離開前還與好友逐一擁抱，場面溫馨。鍾鎮濤及蔡一傑等事後讚阿梅勇敢面對頑疾，指她是個好榜樣，鍾鎮濤更謂會請女友做阿梅愛吃的餃子及牛肉麵。
梅艷芳昨日在尖沙嘴洲際酒店舉行記者會交代她患子宮癌的病況，阿梅勇敢面對頑疾的態度，獲得一班好友支持，包括成龍、劉德華、鍾鎮濤（阿B）、楊紫瓊、張學友、草蜢、許志安、鄭秀文和蘇永康等。阿梅交代病況時，安仔、鄭秀文及楊紫瓊更眼泛淚光，後來阿梅逐一與好友擁抱以示答謝，場面十分溫馨。
事後阿B在電話中說：「見到佢咁堅強面對，真係好勇敢，無論佢需要啲乜嘢支持，我都會盡力幫佢。佢好鍾意我女友（范姜素貞）整嘅餃子同番茄牛肉麵，我哋會整多啲畀佢食，總之佢開心就乜都得。我相信佢一定會打勝呢場仗，佢的確係個好榜樣。」阿B謂他前晚才得悉阿梅真的患上子宮頸癌，當時十分震驚，阿B說：「我見到佢都好精神，講嘢咁好氣，都放心好多。」
蔡一傑在電話中說：「我知道件事後梗係唔開心，人生就係要面對現實，自從上年羅文走咗，到今年咁多事發生，有時真係冇辦法接受。我會對阿梅講，全力支持佢，希望佢勇敢啲醫病，佢嘅朋友會關心佢。我一定會保護佢，重會煲湯畀佢飲，或者傾吓偈。」蘇永康離開記者會場時說：「梅姐開心我哋就開心，我永遠支持佢，希望大家都支持佢。」
陳小春昨日剛巧在洲際酒店工作，他說：「我啱啱喺台灣返嚟，我覺得好突然，其實𠵱家癌症都有好多方法可以解決到，我會打電話畀佢問吓。」
而華仔昨日與李惠敏及黃柏高等到銅鑼灣出席一間餐廳的開幕禮，華仔事先透過助手表示他不會就阿梅病況接受訪問。阿梅的公司稍後會出錢為李惠敏製作新碟，李惠敏說：「我前幾日先知，佢好開朗咁話我知佢冇事，佢好硬淨，有乜難關過唔到呀？」
Twins的鍾欣桐昨日在銅鑼灣出席活動時則說：「希望佢快啲好番，吉人自有天相。記得以前睇過梅姐嘅演唱會，重同佢握手，覺得佢隻手好滑，當時好開心㗎。」蔡卓妍則謂：「我覺得佢真係好堅強，可以撐到今日，重要喺呢個圈。」吳志雄昨則說：「我祝福佢，佢同我成家都識嘅，佢第一次出碟嘅第一張都係送畀我。」
採訪：蔡如育、王連連、汪正文
攝影：陳偉權
