梅艷芳強調自己十分煩擾，不是為了頑疾，而是因為傳媒。「人言可畏。點解喺未證實所有嘢嘅時候，傳媒會幫我作出咁多忖測出嚟？」於是她花了很多篇幅，很多措詞，埋怨記者，批評記者，甚至質疑記者對她這個女病人的用心。
「我覺得咁繼續落去嘅話，會係一個好恐怖、好恐怖嘅結果。」梅艷芳說的是連日來周刊與報章的報道。城中兩大周刊今期都以梅艷芳的病情做封面故事，《壹週刊》以「梅艷芳子宮頸癌」為標題，《東周刊》的標題則是「梅艷芳睇治癌名醫」。
自從這位樂壇大家姐患病的消息傳出後，每天都有傳媒守候在梅艷芳寓所外，「我每日喺屋企望落樓下，五、六架車，七、八架車，好多記者朋友闖出馬路影相，我惟有唔出街，由佢哋繼續喺度。對你哋，可能有一種危險，我驚有交通意外；對我周圍嗰啲隔籬鄰舍，我覺得會製造好多麻煩，我感到唔知點算好，好彷徨。」
她又說：「我相信大部份朋友都係關心我，我今日又見到一班歌迷寫卡俾我，佢哋都成個禮拜冇瞓覺，就係因為你哋（傳媒）嘅報道，佢哋好擔心你哋嘅忖測。究竟我係咪病到起唔到身呢？」
她覺得傳媒不懷好意，「大家唔好成日喺下面等消息，好似等我去死咁。」說完就冷笑兩聲，「究竟你哋係出於關心吖？定係只係出於一種八卦心態？」
她強調，明白記者一定會繼續追訪，「如果你哋鍾意去跟嘅話，咪去跟囉，你哋跟一個病人囉，冇所謂。但係只有一樣嘢，我要求大家，唔好騷擾到其他人，呢個係我嘅要求。」說來心平氣和，卻又好像有點不忿。
本報記者