香港富豪第一代，多白手興家；第二代，多留學外國飽讀書，但是龍是蛇，就睇家山同家教。八方最近遇上唔少叻嘅第二代，同大家報道吓，唔使日日小小超咁悶。
講起富豪接班人，三聯書局幫供應鏈管理巨擘利豐集團，出咗本叫做《供應鏈管理：利豐集團的實踐經驗》嘅書，噚日重特登搞咗個新書發布會。當然，喺咁嘅場合固然唔少得主角，即係利豐主席馮國經博士啦，連鮮有露面嘅馮家千金馮詠儀，都特登嚟捧老竇場。
八方同利豐中人傾起，原來喺二千年嫁咗畀恒生銀行林家後人林詩棋嘅馮詠儀，婚後並冇做全職少奶奶，而係喺家族嘅利豐集團做投資經理，雖是千金小姐，但佢冇乜架子。佢重有兩個細佬，但八方就唔知佢地有冇入利豐幫老竇手。
差啲漏咗，呢本達四百多頁嘅管理書售價一百六十大元，暫時只有中文版，正考慮出英文版。
傳真︰2623-9278
電郵︰