外國人來香港工作，總有他們的理由。
在這間日本料理，我們遇上了兩個從日本來的女子，她們在料理店做侍應，看似是平凡的工作，但在她們身上卻有着異鄉客不平凡的經歷。
記者：李敏怡
攝影：伍慶泉
Model：BoBo（Sunspot）
「我鍾意香港，之前已經嚟過三十多次。香港有咩咁吸引？有成龍囉。我中學時代已鍾意成龍。」淳子說。這位超級fans遠離家鄉，長駐香港工作，為的是更能親近偶像。成龍更間接令淳子遇上現在的丈夫。「七年前，我來香港見成龍，點知重遇到𠵱家嘅丈夫，呢樣係我喺香港最開心嘅經歷。」但老公同成龍邊個重要啲？淳子豪不保留地說：「除咗我的小朋友外，喺我心中成龍第一。」
五十八歲的莉莉十多歲便離鄉別井四處去，到過大陸、台灣、韓國，香港卻是她最鍾意的地方，一留便是二十多年。
在日本料理店工作了十年，不少來港工作的日本人都成為她的熟客。「好多熟客都成為好朋友。三個月前，我轉咗嚟呢度工作，佢哋都跟住我一起過來。」旁邊的店舖經理形容她像一位受歡迎的媽媽生，熟客都跟住她走。近年不少日本熟客都被調回日本，但她仍然堅持留下來，「我打算在香港終老，唔會返日本，我覺得香港是最好的。」她說。
韜哥說呢道豚角煮非吃不可，無論口感同味道，都與中國扣肉相似，但優勝嘅係肥膏無咁多，食落無咁膩。師傅先將新鮮五花腩燒香，去掉多餘的肥油，再蒸十個小時。五花腩在長時間烹調下，會容易散開，所以蒸煮前須以繩把肉紮實，非常考功夫。
呢個煲係呢度另一樣必食之選。唔好以為係一般嘅牛肉豆腐煲，皆因師傅用咗由日本空運到港嘅絹豆腐，入口如絹般軟滑，加上肥瘦勻稱嘅美國牛肉，同埋由木魚水、溜溜豉油等調製而成嘅醬汁，味道鮮甜，肉質爽滑，難怪韜哥一坐低第一樣嗌就係呢道菜式。
呢味鴨胸塔塔，聽個名以為是甚麼法日Fusion菜，但其實是日本居酒屋常見的菜式。師傅會將法國鴨胸煎至半生熟，然後淋上秘製醬汁。半生熟嘅鴨胸肉外層夠鬆脆，內裏肉質軟滑，絕對唔會韌。
香港人食魚生通常只會叫三文魚同吞拿魚，識食魚生嘅日本人就特別喜愛鱆紅，尤其係呢道魚生薄切，不但魚味重，而且肉質爽口。師傅話食呢種魚生嘅最佳配搭並非wasabi，而係酸汁、辣椒同蘿蔔茸。
雖然係炸物，但食落去一啲都唔覺得油膩。同心卷用了美國蘆笋以及師傅自己製作嘅明太子醬，再以紫菜包好油炸。由於火力同時間都控制得啱啱好，所以蘆笋依然咁爽口，味道鮮甜。
這裏還有不少清酒種類供你選擇，左起：久保田千壽、醉心、上善如水及與店舖同名的八海山。
店舖：八海山日本料理?
電話：34269960
地址：九龍尖沙嘴寶勒巷26-36號地下華寶商場1-4號舖
營業時間：12:00nn-3:00pm；6:00pm-2:00am