星期三下晝，街上陽光普照，行人曬到身水身汗，左丁山抹汗都抹唔切。行到大馬路一個相熟報攤，衝口而出：「賠率版。」檔主笑笑口話：「老細，今晚跑馬取消咗呀！不如買份《東周刊》啦！」經佢一講。先至醒起星期二晚打風（杜鵑），馬會立即取消星期三晚跑夜馬。天公真識開玩笑，玩殘咗天文台同馬會，預測有狂風暴雨喎，點知曬到頭暈，平時就一定跑馬，話知佢晚上可能落雨吖！馬會過往落緊大雨仍然馬照跑，點解呢次咁驚、咁心急，隔晚就宣佈取消跑馬呢？其實馬會煞氣好大，過往經常可以震懾風雨，譬如上午落大雨，跑馬時冇雨，散場後又落大雨嘅，呢啲事，左丁山見慣晒，冇理由馬會諸公反為對自己冇信心㗎！
檔主點解叫左丁山買份《東周刊》呢？原來報攤上有一大叠，檔主話成日都冇乜郁過，去得好慢好慢，所以叫啲相熟客幫吓手，買番一份喎！既然係復刊，買一份又何妨，睇吓同《壹週刊》有乜分別！
返到公司，馬主L打電話嚟：「喂，咁好天都冇馬跑，有啲失落噃，一日都係吳嵩唔好，抽到個一檔。」何出此言？馬主L好記性，舊年馬季初開，吳嵩隻「富有心得」操到火紅火綠，跑快活谷最佳途程——一千二百米，抽到黃金一檔，吳嵩開心到跳起，叫晒老友入場預備拉頭馬，點知臨時打風，跑馬取消咗，吳嵩一場歡喜一場空。呢，今次又係跑快活谷千二，吳嵩隻「富有心得」又係抽到一檔，哈哈，賽事又因風雨取消，睇嚟吳嵩隻馬都係無福享受第一檔！