響今屆法蘭克福車展上，快意將會展出旗下最新走迷你MPV路線嘅Panda，新車不僅外形突出之餘，闊落車廂空間及出眾性能表現，都係賣點之一。
從外表而言，呢款走城市迷你MPV路線嘅Panda可謂非常吸引，當中一對炯炯有神嘅頭燈襯以闊大鬼面罩組合，望落倍見吸引突出。然而，全新快意Panda雖然係走城市迷你MPV路線，但其車廂空間卻見來得寬敞闊落，加上前後兩排承托力甚豐嘅座椅，乘坐倍見貼服舒適；與此同時，車廂布局亦經廠方精心設計，既美觀之餘配合齊全車廂設備，亦能增添多一份實用性呢！車內更備有六個安全氣袋組合，以確保車上乘客遇上意外時嘅安全㗎！
另外，廠方為新車安排有多台引擎供用家選擇，當中頂級版會係一台1.3公升直4柴油Turbo型號，雖然馬力輸出（70ps/4000rpm）未見出眾，但處於1500rpm低轉時，已能發出高達14.8kgm峯值扭力，匹配一套5前速手動波箱，起步加速表現亦見靈敏有勁；而呢台柴油Turbo引擎，更能做到慳油及低廢氣排放量嘅特性呢！