記者訪問即將自由行來港的上海儷人，個個省鏡，出手闊綽，識飲識食，對名牌名店瞭如指掌。有幾個毫不忸怩說，此行趁機會結識港男。九七前，內地女歌手艾敬有隻歌仔唱，九七要去香港紅館見識。九七後的今天，黃浦江美少女捨棄紅館，睇中離紅館不遠的五星級酒店，花三千八住兩晚，還會去淺水灣酒店歎下午茶。金飾金馬桶太大陸表嬸了，上海靚女要去卡地亞買心頭好新款名錶。雖然相距兩小時航程，滬港婦女心連心，同樣視瘦身為終極靚爆鏡目標，瘦身Spa是行程指定項目。
跟惠州鄉里眼界不一樣，上海來的中產打工妹，嫌蘭桂坊老餅，要in過同胞，到耀華街的小店摸杯底。怪不得人人說上海已經超越香港，兩地文化雖然有差異，但在女士自主消費這一關來看，兩地無甚隔膜，互通流行情報，交換扮靚心得，應該有偈傾。上海女人擺闊夾主動，相當海派，這方面大勝密實的香港同性。香港女子愛作大，但跟上海女人比，小兒科矣。上海中學生關注整容，整型科暑假大旺場。高中生還是由母親領着去診所的。北京更有大學搞女生選美的創舉。內地美人兒不愁沒出路，肯對港男送秋波，是東方之珠的榮幸。既然人家不嫌我們男生尾音囉囉聲、背囊扣毛公仔、手機鈴聲是Twins歌仔，無謂計較誰是劣幣誰是良幣了，肯來港使錢兼𠝹仔的，真巴閉。