咪話香港人莫財，剛喺星期三推出嘅PS2《高達：相逢宇宙篇》限定版炒到成$1,500至1,600蚊都有價有市，高達魅力真係驚人，因乜解究今次炒到咁勁？原來今次限定版入面附送嗰隻《高達1.5加強版》只出一批，連日本都炒到20,000日圓以上先有交易，而且今次每間舖要入成40隻普通版，先可以有一盒限定版配額，唔炒到上天至出奇。不過普通版貨源尚算充足，街價都係400蚊左右，重有限定高達DVDVIDEO再加個靚仔樽蓋送。
文：打機鐵人
當年喺PC-ENGINE上谷機之作《天外魔境II》，今次會喺PS2同GC上面復刻登場，今次GC就威水少少，9月25號就有得玩，PS2版就要10月2號先有，今次亦會有行貨推出，遊戲定價4,980日圓（約$350港元）。
講開復刻，今個星期XBOX隻《RentAHero出租英雄》(台灣譯做致命英雄，真係攞命)已經見街，市價約$340至360左右，隻Game喺已停產嘅DreamCast上出過，今次喺XBOX上再出，美其名係比未玩過嘅再玩，實際上即係搶多一次錢，再係咁喺XBOX上推出啲舊貨翻新作品，都唔知幫佢定害佢。
