港股升上萬一大關後，走勢變得極度反覆，特別係二三線股份，大上大落，每一轉都起碼七八個價位，家下熱錢多，獲利貨亦多，股民買賣，都會跳價掃貨同沽貨，未來兩三個禮拜，呢種情況仍會不斷出現，直至大市見頂為止。
噚日恒指雖再創今個升浪嘅單日同收市新高（11196同11138點），成交亦爆燈，有189億元，但行情就好反覆，午後一段時間落得幾急，恒指一度倒跌40點，但期指臨尾又掃番上去，結果高水34點，個市重未玩完。
藍籌股已有疲態，不過，好友還有王牌，就係中國移動（941）同滙豐（005）呢兩隻重磅成份股，噚日中移動發力，擔負起拉動大市上升嘅重任，到用埋滙豐之後，就要小心。
消費股全面下跌，特別係近兩日急升的，跌得亦急，其實消費股呢個大浪，有唔少股份，特別係啲冷門股，升到過晒火，調整絕對正常。筆者看好零售股前景，今次調整，正係低吸機會，個別銷售網絡較強的如莎莎（178）、卓悅（653）、恒豐金業（870）和六福（590）等，可優先考慮。
國企調整，似近尾聲，強勢股已再發力，安徽海螺（914）高收6.0元，升0.3元，中海發展（1138）升0.225元，以及一拖（038）升8仙，較為突出。重鋼（1053）中段亦曾彈上3.075元，但收番2.975元，仍跌1個位，暫受制10日線（3.1元）及20日線（3.05）阻力，衝破後可追入。
基金又來料，話會造隻中國鋁業（2600）。佢哋以前推介嘅中資股都好對辦，好似筆者提過嘅招商局（144）、華創（291）同中銀（2388）等，都有可觀升幅，今次隻中鋁，目標話睇3元。
中鋁業績好勁，03年度（12月止）嘅上半年，盈利15.75億元人民幣，大升1.75倍。由於內地氧化鋁短缺持續，下半年平均售價可高於上半年，有大行預測其全年盈利可達34億元人民幣，目標價為3.2元。
由7月初開始，中鋁在2.1至2.5元間橫行，噚日再試衝高位阻力，只要基金一收夠貨，就會破位而上，初步目標係2.9元，年底可見3.25元。
郭兆誠