陳曉東日前不避嫌邀請其新緋聞女友郭慧，演出其新歌MV，但二人並非飾演情侶，郭慧更女扮男裝，反串做東東的情敵，而在MV內東東的真命女友則全程冇出現，十分神秘。
陳曉東日前為新歌《隱瞞》拍MV，他更不避嫌邀請郭慧擔任該MV的主角，而郭慧更穿上黑色西裝女扮男裝，二人拍了一個通宵始收工。
該曲內容描寫一個人徘徊在一段被隱瞞的感情中，東東在MV內飾演一名調酒師，於酒吧認識一名神秘女子，二人發生一段錯綜複雜的感情。但該神秘女子並非郭慧，東東說：「同我有感情關係嘅女主角，全程都唔會出現，咁先夠神秘。」郭慧飾演東東的情敵，她在故事結束前拖着神秘女主角離開，內容更會涉及同性戀及異性戀題材，東東不以為然說：「呢個只係導演諗出嚟嘅故事情節，大家睇完後體會到乜就係乜囉，可能每個人體會嘅嘢都唔同。」
東東又說：「呢首歌係林夕填詞，講一個人將回憶變成遺憾，我最鍾意其中一句歌詞『午夜的飛行得到終站』，即係冇得再幻想落去，咁反而好有想像空間。」
對於與緋聞女友郭慧合作，東東表示：「我同佢只係好朋友，緋聞唔係真嘅，我哋咁熟亦唔會有尷尬，我重成日叫佢『打令』㖭。」郭慧聞言則大笑說：「我真係覺得好好笑，咁都有得傳。」問到有否發展機會？郭慧又再大笑說：「你話如果會有發展，我地就唔會喺咁多人面前叫大家做『打令』啦！」
採訪：蔡如育
