新車速報：HummerH2民用巨無霸

香港被譯名為悍馬（Hummer）嘅美國軍用車，因其身形龐大，並不適用於一般城市用途；因此，走民用路線嘅H2車系便應運而生。雖然右軚新車未正式抵港，惟代理早已運嚟左軚版運銷內地；究竟新車有幾正？不如一齊嚟先睹為快啦！

記者、攝影：陳偉林　
ImageGirl：Wendy

■車頭加裝有防滾架，既可點綴又有多一份實用性。

■嘩！個頭冚好大，但想唔到開關卻見輕巧容易。

■車頂唔止設有行李架，重有一排霧燈組合，既奪目又有型。

■直立式尾燈鋪排，有易於察看嘅安全性。

外形穩紮修長有個性
打從外觀所見，全新HummerH2跟原有型號，外形來得高一點同修長，看上去雖然稍欠線條嘅美感，惟粗獷嘅造型，仍教人感受到一份強悍而剛勁嘅魅力。車頭柵格式電鍍鬼面罩可謂新設計，匹配埋雙圓大燈、霧燈，以及車頂一排細燈組合，既奪目又醒神。而車頭及車尾額外加設嘅防撞架及後備輪胎，重會係不錯嘅保護設施呢！

■遇有需要時尾排可收摺起，令車尾搭載容量增加。

豪華講究設備吸引
借助車身旁嘅門枕踏入座艙內，豁然開朗嘅觀感，跟舊有Hummer可謂截然兩樣。皆因原有Hummer屬軍用設計，車廂中間收藏有一台6.0公升偈作驅動，因而座椅只能放置響兩旁四個角落位置；反觀新H2嘅座席鋪排，卻屬傳統轎車化嘅三排七座位組合，加上高級真皮鑲嵌，除軟滑貼服外，前排重有全方位電控調校，還有前後獨立恒溫冷氣及送風口、獨立照明，重有高級CD音響同電窗電鏡配搭㖭！

■兩邊車身加有門枕腳踏，上落車自然好輕鬆。

■前後三排可提供七個座席，而前排更備有全方位電控調校。

■一體化嘅中控台設計，除音響及冷氣外，左邊重有高扭力四驅及拖載用嘅選擇按掣。

■新款H2車廂陳設變得房車化，跟一般大型SUV無疑，既寬敞又吸引。

V8偈強悍有力隔音出眾
新款H2用上一台6.0公升V8偈，輸出驚人之餘，重附有可調校高扭力嘅恒式四驅系統，匹配電子4前速自動波，駕駛輕鬆自在之餘，輔有風油軚嘅轉向裝置，由極左至極右不過三手軚而已，就算係女士們操控亦全沒有半點難度；反而最令人感到意外，會係一套懸掛表現柔韌有力又不失支持度，行車最高時速重接近180km/h，較原有Hummer不過極速70km/h上落，真可謂天淵之別呢！再者，車廂隔音表現好出色，引擎及路嘈水平穩定，加上本身StationWagon七座位配搭，倒真有其號召力㗎！

■部車越野性有幾厲害？睇吓前後懸掛上落幅度有幾高就知啦！

■一套電子4前速自動波轉檔敏捷利落，旁邊重有杯座組合。

■四幅式軚環轉向輕盈，左右兩邊重附有遙控按鍵。

HummerH2StationWagon規格
引擎：5967ccV8SOHC
馬力：316ps/5200rpm
扭力：49.8kgm/4000rpm
傳動：4前速自動波，恒式四驅
懸掛：（前）柱式獨立（後）五連桿
制動：（前）碟式（後）碟式（ABS）
輪胎：LT315/70R17
尺碼：4820×2063×2080mm
軸距：3118mm；車重：2909kg
新車售價：$1,619,500（右軚標準版）
車輛提供：AutoTechfair（23561178）

■H2一台6.0公升V8偈，令性能表現倍見出眾。

代理揸Fit人Tony有話講
美國Hummer全新H2，完全係針對民用市場開發嘅全天候SUV，既保留有軍用版Hummer嘅驍悍一面，而寧靜舒適嘅座艙鋪排，重可以媲美高級豪華轎車包裝；再者，變得修長嘅車身尺碼，穿梭於鬧市間亦無問題㖭！

靚女Wendy點睇部車？
Wendy坐響駕駛席旁，由於路上嘅行人同駕駛者，都無察覺到呢部身形龐大嘅H2屬左軚關係，好多人嘅目光都投向Wendy身上，並流露出一份愕然；相比下，Wendy就覺得好自豪，置身其中既有一份優越感之餘，佢重話部車坐得好闊落同舒適，兼且重Feel到一種女士們喜歡受到保護嘅安全感喎！