陳小春形象前衞，講嘢又大膽，所以成日畀人好出位嘅感覺，有時講到激動，佢重會不自覺咁爆粗㖭。馮仁昭知道小春擁有一半客家人嘅血統，平日又鍾意學番幾句地道方言，佢近排苦練台語歌曲《心事誰人知》，打算進軍台灣台語歌壇，佢話好希望出年有機會報名競逐台語金曲獎項。
不過聽過小春講台語嘅人，就話佢講台語有啲似江湖腔，而講台語粗口，小春亦好拿手，佢可以將台語粗口連珠炮發，一輪嘴咁講出口，好似「操××」、「幹××」，甚至乎問候人哋娘親嘅粗口都好流利，佢可以一口氣rap到尾，小春講完重可以面不改容，連地道嘅台灣人都話服咗佢。
舒淇出道以嚟，除咗三級片，最為人熟悉嘅係佢厚厚雙唇，拍過飲品、沐浴露同護膚品等各式廣告之後，原來舒淇最想拍嘅係洗頭水廣告，佢之前重去咗泰國拍好條片，稍後就會去台灣出席記者會。舒淇𠵱家喺雲南同劉燁合演新戲《美人草》，遲吓就要去泰國拍《見鬼》續集，佢睇完李心潔拍嘅《見鬼》後嘅感想係：「好恐怖呀！」
林建岳旗下嘅紅館新人吳慧冰同生力啤廣告模特兒Mandy，噚日就喺九龍塘又一城BIOTHERM分店為最新推出嘅秋季系列化妝品宣傳。
只得二十二歲嘅吳慧冰冇化妝啲皮膚重好幼滑，問佢嘅護膚心得時，佢重話：「最緊要落妝乾淨，我重會臨瞓前同起床時飲一杯鮮奶，對皮膚更加有益。」吳慧冰稍後會參與電影《無間道III》嘅演出，戲中飾演警察，佢話：「我都好緊張，因為好多影帝級前輩，但都唔會畀自己太大壓力。」
台灣製作人劉正中近排籌拍一套以賽車手為主題嘅劇集《極速傳說》(暫名)，有意搵林志穎主演。外間指林志穎開價一集五萬港紙，製作單位聽到都嚇一跳。林志穎嘅經理人夏玉順噚日聽到呢個消息，即刻好唔客氣咁鬧個製作單位：「下流，拿林志穎炒新聞！」夏玉順自爆林志穎拍《陸小鳳》時，一集計起嚟都有十二萬港紙。
