自由行概念股終於出現回吐，Joyce（647）挫12%；堡獅龍（592）挫13.6%；GayGiano（686）挫16%；六福（590）挫6.5%；景福（280）挫15%。
黑客話，炒家確係開始出貨獲利，不過散戶熱情未減，仍夠膽入市撈底，散戶嘅動力可能超乎炒家想像，單係睇吓大市成交接近190億元就可見一斑，散戶現時入市未必一定接火棒，隨時可能令炒家心思思買番轉頭。好似恒豐金業（870）咁，大戶兩度重手將股價質至1.52元，但都俾散戶托回1.58元收市，全日只跌4.8%。至於點解班炒家咁快要出貨？黑客話，每當二三線股炒得過高，證券行都會收緊孖展。
恒指噚日走勢好反覆，有人獲利回吐，有人換馬追捧落後，期指好友就托住中移動（941）及長和，令大市唔跌得。當滙豐（005）消化完短期沽壓後，大市相信可見12000。
中海油（883）兌現「承諾」，果真派中期特別股息每股0.18元，連同中期息0.14元，合共派0.32元，據講唔少大行開始調高中海油投資評級，重急call芬佬增持，睇嚟今日股價表現會相當靚仔。
中聯系統（757）由霍建寧坐正任主席後，即刻勁升47.3%，收1.09元。e莉莎話，和黃（013）入股細公司經常都有，但就好少會由霍大班親自掌舵，消息一曝光，市場即憧憬中聯日後將成為長和系一隻重要投資工具，受到追捧。
阿虎