銅鑼灣大地主之一希慎興業，陸續將旗下物業翻新，其中動用一億四千萬翻新，重新定位嘅銅鑼灣嘉蘭中心，已改名為利園廣場二期，希慎興業商舖租務總經理陸穎思話，新租金有兩成升幅，已經租出咗八成樓面。
物業位於港島區購物中心銅鑼灣，新租戶當然包括國際品牌，已落實嘅有Gucci、JeanPaulGaultier同Tod's等，二樓設兒童購物天地。陸穎思解釋，舊商戶中不少係售賣兒童產品，為保留原有特色，又可以讓媽咪購物後，順道為子女添置衣物，所以作出有關安排。商場租戶重有食肆、美容，以及生活家品等。
利園廣場二期商場可出租樓面超過十一萬七千呎，有四十至五十間商舖，十月完成翻新工程，料明年三月全部商舖就可以開張營業。
為推銷貝沙灣二期南岸，電盈噚日先向各家地產代理進行全民大會，講解樓盤嘅獨特賣點。
佣金基本上係一點五巴仙，但銷售難度較高嘅單位，或會高些少，細節未定。
電盈話，今次第二期又有新搞作，主人房浴室安裝全港新樓少有嘅暖毛巾架，最啱冬天用。廚房重有啲特別設施，除咗例牌嘅焗爐、微波爐之外，新引入可以蒸魚嘅蒸爐，照顧周到。
長實趙國雄果然係集團嘅賣樓大使，喺本地市場孭重飛，𠵱家重要負責到美加為畢架山一號宣傳。
噚日下晝起程去加拿大，出發前重出席上晝舉行嘅宇晴軒記者會，所以要帶埋行李去售樓處，記者會一完就立刻去機場。
趙國雄話，今次行程共十日，會去四個地方做宣傳。佢之前一直話，有信心吸引移民港人買樓，所以佢有信心今次宣傳會有收穫。臨走前佢話，簽唔到單唔敢返嚟。
由騏利集團發展嘅元朗新盤明珠花園，下個禮拜開售，合共十二個單位，發展商大有來頭。
公司喺三一年由胡兆熾成立，以代理「喜蓮」洗頭水起家，到佢個仔，即係胡關李羅律師行嘅創辦人胡寶星接棒，七二年喺交易所上市。
九○年將公司私有化後，進軍香港同內地房地產，喺中環建立騏利大廈作為公司總部，並進駐南區，發展一系列以「喜蓮」命名嘅豪宅收租。明珠花園個英文名都係叫「喜蓮」。
𠵱家公司已交咗畀第三代嘅胡家驄負責。
蘭西
電郵地址：
