近呢幾個禮拜，如果要數見報最多嘅政治人物，除咗卿姐，睇怕都算係北京港澳辦兩位副主任陳佐洱同徐澤。
好似噚日咁，徐澤又喺釣魚台大酒店見平均年紀都唔細嘅青年才俊團，成員包括八方細細個已經聽佢首《我是中國人》嘅張明敏。
當個個排排坐好之後，徐副主任就用廣東話一一回答傳媒問題，問佢會唔會叫訪京代表支持董建華施政，佢坦白話：「梗係要啦！」問佢簽訂CEPA香港使唔使多謝中央，佢話「唔使多謝」，因為中央都係希望香港好，又話CEPA只不過係一張紙，紙要變成實質東西都要靠香港人自己努力。
最後問佢有關老董民望，佢就話如果答埋呢條，拜託記者最好唔好報道佢講過嘅嘢，因為佢唔鍾意喎；佢重好有性格咁話：「你哋如果如實報道，就要寫埋我最後一句，唔希望登，唔希望寫。」
（圖）張明敏咁多年前高唱《我是中國人》，𠵱家重可以叫到青年，都算厲害。
傳真︰2623-9278
電郵︰