佩魯賈會長加奧斯舊事重提，話會喺明年一月引入瑞典女子球員踢意甲。我求大俠初初聽都以為佢吹水，但佢呢次講到好具體，似層層，搞到連外國電訊社都出埋此姝張相，即管睇吓佢係咪真係咁有「吉士」搵個女將踢意甲，定還是志在玩噱頭啦。
此姝體如凝脂、腰如嫩柳（純粹求大俠最初幻想），實情係一個五呎四寸，叫漢娜龍格保（HannaLjungberg）嘅廿四歲女子。由於佢踢法似上季嘅米高利，所以意傳媒形容佢為「女米高利」。加奧斯大讚夏娜好波之餘，又話意足總無規定唔比女人踢意甲，簽實佢咁話。佩魯賈不嬲愛出位，以前簽亞洲人中田英壽、利沙爾，到今季簽卡達菲個仔，盡收宣傳之效。假如今次又俾佢創先河都咪話唔犀利。
我求大俠對愛華頓日前賣走彭比治，真係有啲唔明，表面上可能要買基爾賓尼關係，但原來同慘敗畀利物浦有關。領隊莫耶斯賽後大發雷霆，話班防守中場表現極差，踢正選嘅彭比治即時同佢理論，莫耶斯一怒之下將佢平價放走。記得李鐵剛啱停賽唔使遭殃，都算避過一劫囉！
前年英格蘭喺世界盃外圍賽作客大勝德國五比一後，有生產商即刻推出印住呢個比數嘅圖案T恤應市。估唔到富咸啱啱喺超聯作客大勝熱刺三比○後，亦喺球會專門店推出印住「大勝熱刺三比○」嘅圖案T恤噃！梗係啦，五十六年嚟第一次作客熱刺贏波喎，重唔乘機威威！
阿仙奴喺今屆英超可以四戰四勝，新簽嘅德國門將列文應記一功。我求大俠覺得列文𠵱家嘅狀態比簡尼好，應可以喺國家隊坐正。惟簡尼係德國教練禾拉嘅愛將兼國家隊隊長，加上列文同簡尼同齡（三十四歲），就算想等時間亦唔許可，列文唔使旨意可成國家隊嘅第一號龍門。
拜仁中場薛羅拔圖，喺本月中推出自傳搵銀。但我求大俠覺得佢唔係太有品，因佢喺自傳中數前利華古遜教練達姆不是，又馬後炮話嗰陣時已認為佢有吸毒。達姆自畀德傳媒踢爆係癮君子後前途盡毀，𠵱家喺土耳其費倫巴治教波，諗住重新開始，薛拔羅圖無謂多一腳啦！