女子組合Twins的鍾欣桐（阿嬌）因自小玩田徑，故擁有一雙甲組腳，日前她為纖體公司拍宣傳照時，穿上大露背短裙真空上陣，展示其滑溜玉背，不知她是否想以靚背掩飾一雙粗腿呢？
女子組合Twins的鍾欣桐是張玉珊經營的纖體公司修身堂的代言人，她日前拍攝宣傳照時，穿上大露背短裙真空上陣，展示白皙滑溜玉背。
問到阿嬌平時護理玉背的心得，她日前說：「我平時好少護理個背脊，不過我覺得皮膚好，背脊都會滑啲，所以我盡量少食煎炸食物，否則會好易生粒粒，可以嘅話就飲多啲水，幫助排除身體嘅毒素。」
阿嬌纖體前最為人注意的是一雙甲組腳，她說：「其實我細細個玩開田徑，所以對腳係有啲肌肉，但呢啲係好難減，好彩我都減咗少少。至於我個patpat都減咗幾吋，𠵱家我好滿意自己嘅身形，我都好羨慕欣宜減肥咁掂。」
此外，經理人霍紋希（Mani）昨日表示Twins和男子組合Boy'Z都相繼病倒，她說：「佢哋四個都發燒同感冒，源頭係Boy'Z嘅Steven先發燒，跟住傳染畀Kenny同Twins，𠵱家阿Sa（蔡卓妍）同阿嬌都燒到一百零幾度，兩個要喺屋企瞓覺休息，所以佢哋四個嘅工作都被迫臨時取消。」
採訪：比華利
