講開護照，家陣愈來愈多人用特區護照，因為免簽證國家比BNO多好多，但墨西哥例外。
今年WTO第五次部長級會議喺墨西哥坎昆（Cancun）舉行，大會安排搞到一頭煙，據講一個香港代表團高官竟然不獲發代表簽證，要出個「商務簽證」。政府高官都俾墨西哥領事館玩殘，八方只係一介小民，當然不能幸免。
八方跟住大會嘅申請採訪簽證指引，要求工商及科技局代表大會出封信，證明八方會去採訪。點知去到領事館搞咗一輪，職員至話指引繙譯有誤，英文本話要大會證明，但係西班牙文本就話要報館證明，白跑一趟。
另外指引話記者可以免費申請採訪簽證，但職員都要收七百七十四蚊，八方拗佢唔掂，惟有照付。點知翌日去攞簽證時，職員又話搞錯兼回水。講到呢度，唯一值得安慰嘅係：今次工商及科技局長曾俊華去墨西哥開會，會爭取兩年後喺香港開部長級會議，各方代表實舉腳贊成。
傳真︰2623-9278
電郵︰