開早拍劇靠男友MorningCall
馮仁昭四圍超：楊思琦捱唔住哭訴

拍緊無綫新劇《無名天使3D》嘅楊思琦，一直被傳同郭羨妮跟佘詩曼呢兩位拍檔不和，楊思琦早前重默認俾人蝦，但實際佢係咪咁可憐呢？真係見仁見智啦。
楊思琦喺《無》劇中佔戲好重，加上又有打戲，所以三位女角都捱得好辛苦，個個都要晨早六點開工，直踩到凌晨四點，點知次次思琦一開早班就梗有事發生。有次佢開朝早六點，工作人員call極都搵佢唔到，後尾無計可施，只好打畀楊思琦個緋聞男友李永豪想辦法，點知李永豪又搵到佢喎，咁佢哋兩個嘅關係，真係不言而喻啦！

「拍劇咁辛苦嘅」
又有一次，楊思琦凌晨四點收工，第二朝六點開工，佢就冇遲到喎，但就含住兩泡眼淚到場，對住導演喊，佢重同導演講：「點解拍劇咁辛苦嘅？」講完就忍唔住喊出嚟。
此外，楊思琦噚日喺將軍澳拍攝《無》劇海報，問佢中秋節會唔會同李永豪一家人月兩團圓，佢話：「睇吓有冇時間啦，但都應該冇時間㗎啦。」

李玟進攻內地得罪人
台灣天后張惠妹最近頻頻去內地宣傳，點知另一天后李玟都唔執輸，佢本來呢個月會出最新外語碟，點知隻碟要延遲，李玟就趁機下個月去北京、南昌、寧波、重慶同長沙舉行個人巡迴演唱會，不過佢二家姐兼經理人Nancy，竟公然話內地演唱會嘅市場混亂，有時簽咗白紙黑字，都會有收唔到歌酬嘅情況，唔知呢番言論，會唔會搞到冇內地老闆敢搵李玟呢？

楊采妮靠自然sell客
成日被傳復出嘅楊采妮，一直揚言就算重出江湖都係順其自然。其實楊采妮做咗咁多年生意，真係攞到唔少經驗，所以就算復出，都係由拍廣告開始，等觀眾印象深啲。最近楊采妮就成為美容產品Kirei代言人，而廣告商就係睇中佢簡單嘅生活態度。其實楊采妮咁強調自然，不如做保護自然生態代言人重好啦！

倫永亮悼周匡朝
曾經喺電影《金枝玉葉》同曾志偉演過對手戲嘅圈中人、被暱稱姑媽嘅周匡朝早前逝世，噚日佢嘅家人為佢喺香港殯儀館設靈，但就謝絕記者採訪。而周匡朝生前有唔少圈中好朋友，當中倫永亮最早到達靈堂，而梅艷芳、梅雪詩、謝君豪、張曼玉、梁家輝夫婦等都有致送花牌，劉嘉玲亦有到場拜祭。

好姨燕窩蛋糕有排食
薛家燕（好姨）日前喺深圳出席內地某品牌嘅燕窩同蛋糕發布會，早前以七位數字簽約該品牌成為燕窩代言人嘅好姨，日前再以七位數字擔任該蛋糕產品代言人，佢話：「之前已經幫佢哋嘅燕窩簽咗兩年合約，都有成二百幾萬酬勞，今次再簽蛋糕，酬勞梗係會比之前多啲啦，重簽咗三年。」好姨又話產品只贊助佢一個人，老闆一聽到後，就即刻同好姨講會贊助佢全家，好姨梗係好開心啦。