港股噚日大升，創出今個升浪多個新紀錄，（1）恒指成功衝破11000點大關，新高11114點，收市新高11102點；（2）上升股份628隻（不計認股證），遠超出7月14日的546隻，百花齊放場面重現；（3）成交174億元，又高過8月13日的161億元；重有（4）升幅超逾20%嘅股份有46隻之多。
熱錢滾滾而來，場面墟冚，所有指標都向好，呢個大旺市，起碼重可以玩多兩三個禮拜。大市今次出現消耗性上升，恒指同個別股票會升到邊一個位，冇人可以預知，但升完之後，肯定就出現中期調整，而調整幅度亦唔會細，所以，踏入10月，大家就要好小心。
零售股急升一輪後，轉向個別發展，GAYGIANO（686）、景福（280）同位元堂（897）繼續上；而莎莎（178）、卓悅（653）同恒豐金（870）等就出現調整，正如噚日所講，零售股𠵱家先係牛市第一期，每一次調整都可低吸，下一個浪升得重急。
零售以名牌最吃香，其實有隻揸住名牌最多嘅公司，呢一輪股價都冇點郁過，佢就係聯洲國際（048），8月頭已經見1.7元，噚日都只係1.76元，相比其他升幅以倍計嘅零售股，確實大落後。
聯洲手上有48個品牌，其中10個，包括Goldpteil、Junghans、PierreCardin及Mexx等，係重點推出嘅品牌，現時市場主力在歐洲（佔營業額80%），近期致力拓展亞太區市場，而自由行開始以來，集團在香港的銷售額明顯上升，加上CEPA推出，聯洲已計劃增加在港的設計和生產工序，以進軍內地市場，相信香港和中國將會成為聯洲另兩個重點市場。
聯洲往績PE38倍，確實令人窒步，但截至5月底止嘅03年度業績（快將宣布），由於歐洲業務理想，營業額大幅上升，加上歐元升值提供可觀外滙收益，盈利料急增，而PE亦會回落到吸引水平。
大戶收集聯洲，好有耐性，足足收咗1年（走勢形成大圓底），今次破位而上，短線目標2.2元，中線可見3字頭，潛在升幅逾7成。
郭兆誠