外號米老鼠嘅投資推廣署署長盧維思（MikeRowse），「產地來源」係英國，但係佢一早就入咗中國籍，重叻到連回鄉卡都攞埋，不過就俾中國海關人員懷疑佢用假證。
米老鼠同八方講，佢早排攞到張回鄉卡，以後返大陸唔使次次辦簽證，方便好多。但話說佢去到上海，過關時關員睇到眼都大埋，問佢點解揸住回鄉卡？佢好搞嘢咁答：「我返家鄉當然用回鄉卡（HomeVisitPermit）啦。」
關員仍然半信半疑，好細心檢查米老鼠張回鄉卡，睇吓張證係咪偽造，張相係咪佢自己黐上去。佢話關員叫佢填入境申報表，佢反駁話揸回鄉卡唔使填表，關員都冇佢符。八方估計關員呢次一定要寫報告，話放咗個「鬼佬中國人」入境，叫其他部門醒定啲。
盧維思話佢喺外國都成日遇到類似事件，佢家陣用特區護照，封面大大隻字寫住「中華人民共和國」，重有個大大國徽，外國關員一樣睇到眼都大埋，問佢：「你係中國人？」佢就會好自豪咁話係，重叫人哋凡事唔好睇表面呢。
傳真︰2623-9278
電郵︰