以往馬會一想開投注站，就會有居民請願遊行反對，怕影響區內治安，但距離觀塘市中心不遠嘅秀茂坪商場班商戶就唔係咁諗，商場舊年落成到𠵱家唔見特別旺，早排沙士更搞到商戶喊晒，要走去搵房署商業科，希望馬會肯去嗰度開投注站，話晒馬會都係「名牌」，起碼跑馬日可以帶旺吓個場。
觀塘區議員伍兆祥都話：「如果有投注站，起碼唔使搭車落觀塘，買六合彩都方便啲，有時可以一面刨馬、一面歎茶。」
不過，馬會發言人就同八方講，觀塘區已經有三間投注站，服務範圍包括秀茂坪，秀茂坪居民往來觀塘嘅交通都算方便，所以暫時冇計劃喺秀茂坪商場內開投注站，但會不時檢討。咁講法，睇怕商戶都要再諗吓有冇第二個「名牌」可以幫下手。
（圖）秀茂坪商場商戶好想馬會喺商場入面開投注站，但馬會就話暫時冇咁嘅計劃。
傳真︰2623-9278
電郵︰