日本電影圈已經好耐冇一套好收得嘅純偶像電影，最近少女偶像工廠Morning娘家族，派出三個最有人氣嘅成員後藤真希、石川梨華同藤本美貴，希望靠佢哋三個令正統偶像派電影可以「大復活」。
三年前Morning娘主演嘅《Pinch-runner》的確收得唔錯，而今次後藤單拖拍《青春儍瓜料理學校》，石川就同藤本就合作《17歲~兩人之旅程~》，重要係一張飛睇兩套好抵睇嗰隻，但我羅拉一睇劇情，就立即頭擰擰。
後藤嗰套講佢冇生存目標，一日無心插柳報讀料理學校，點知武田鐵矢等老師全部都係騎呢之輩，令佢得到唔少領悟。而石川嗰套就連武田呢啲老戲骨都冇，淨係講佢一個好積極、一個天生反叛，最後就成為好朋友。一句講晒，果然係典型嘅偶像片，除咗忠心fans都好難搵人入場。
不過你又唔使擔心套戲會蝕大本，一來成本高極有限，二來啲相關產品利潤豐厚，好似我啱啱買嘅呢本同戲名嘅劇情介紹書，有大把佢哋嘅靚相同一切幕後花絮，香港fans無緣睇套戲都可知八八九九，淨睇後藤點一個鬥石川加藤本兩個都夠過癮啦！