游資噚日果追捧紅籌股，其中華潤創業（291）大升9.26%，收報8.85元，成交高達5.2億元，表現足以媲美一級大藍籌，深圳控股（604）更勁升11%至1.26元，成交逾1.7億元，其他被掃高的落後股有合和基建（737），大升8.75%，重上水面，收報4.35元，成交1.85億元。
最令人興奮當然係股東人數最多嘅地鐵（066），升6.5%，收10.70元。前排地產股大反彈，地鐵亦冇乜點升，現時只係追落後，如果大市短期要挑戰12000，地鐵直撲12元大關，相信不成問題。
唐財爺上任後，香港經濟氣氛好番好多，似乎佢比阿董與阿松腳頭好好多。佢又話希望「杜鵑」可吹走晒香港嘅衰氣，令SARS不再來，阿虎都想成佢貴言。
不過，唔知佢所講嘅衰氣，包唔包括埋阿董呢？香港人主要資產喺層樓度，只係股市升而樓市唔升，都幾難消除香港人對阿董嘅怨氣。
廖銀（1111）又傳被台資洽購，股價炒起6.5%至12.25元，成交達2318萬元。廖企（194）賣唔賣廖銀主要睇作價，有傳聞話冇15元就唔使諗。港基（636）放盤咁耐都未賣得出，睇嚟買家態度十分審慎。不過，黑客話，本地註冊銀行因為CEPA關係令身價高咗，放盤叫價自然高，除非買家肯加價，否則銀行併購唔易成事。
零售股噚日照炒，不過六福（590）有傳聞芬佬正在減持。
阿虎