唐寧上月到杭州新昌，拍攝無綫新劇《大唐雙龍傳》外景，當地每日的氣溫平均高達四十度以上，結果唐寧鼻竇炎發作及中暑，上周往當地醫院吊鹽水後，日前她已返港入院做身體檢查。
無綫新劇《大唐雙龍傳》大隊上月出發前往杭州新昌拍外景，當地天氣極度炎熱，每日平均高達攝氏四十度以上，眾演員包括林峯、楊怡、唐寧、陳山葱及伍詠薇等，均熱至喊救命。
據知早前已有內地演員及多名臨時演員先後中暑，唐寧上周亦因鼻竇炎發作及中暑，被送往當地醫院吊鹽水。
唐寧早已向無綫度期返港拍攝食品廣告，故日前已返港，前晚她往浸會醫院作身體檢查，昨晨唐寧接受抽血、驗尿、照心電圖及X光等。比前略為清減的她昨日說：「其實𠵱家都冇乜嘢啦，主要係因為嗰邊氣溫同香港差別大，我聽啲工作人員講，話最熱嗰日四十八度，好彩嗰日我唔使開工。」
不過，唐寧在當地亦病了一個星期，她說：「我感冒同咳，鼻竇炎發作，有日拍戲都熱到暈咗，後尾坐埋一邊唞吓就冇事，我唔係拍得辛苦，只係太熱啫，我哋每日飲好多水，飲完唔使去廁所，因為個人不停咁流汗。」眾演員豈非一身汗臭？唐寧笑說：「噴香水囉，大家都係咁，唔會發覺㗎。」
除唐寧外，陳山葱亦試過在一日內因中暑而暈倒兩次，他日前接受長途電話訪問時說：「公司啲安排好好嘅，但嗰日太熱，我朝早已經休克，暈咗幾秒，之後重嘔，到晏晝又突然休克，又暈咗幾秒鐘，所以我都有睇醫生。」
採訪：朱芷瑩 攝影：陳志嵐
服裝及場地：SistyrMoon（CausewayBay）
髮型：Daniel（Chin.G）
化妝：Emma（Booming）
