目前市況，真係乜都可以炒得一餐。
噚日經紀黃叫小初留意越秀交通（1052），小初以為經紀黃交行貨，例如翻炒公路股、炒落後之類嘅藉口，但佢話唔係，隻股好似同阿媽將有搞作，唔排除股價會先郁。
越秀交通早排跟隨一眾公路股反覆上揚，在1.80元水平徘徊過一陣，上周又炒番上2元樓上，噚日雖見有獲利沽盤，但股價仍企硬喺2.075元，冇起跌。
經紀黃說，越秀交通將在下周二公布中期業績，估計唔會有好大驚喜，但據講好戲在後頭，故此可以留意吓。
另外，經紀黃早排品題過嘅中國海外（688），噚日公布業績前已經偷步炒上，勁升16%，收1.09元，成交急增至1.27億元。
經紀黃話，公司去年要撇嘅帳已經撇晒，今年盤數應該好企理。市場傳聞，中國海外有意配股集資，睇家陣股價走勢咁靚，相信距離落實之期不遠矣。
慕容小初