港股是日兩個新高，大市成交同恒指收市價都刷新今年紀錄。恒指大升162點，收報11102，突破萬一點關口，望上去，要到萬二附近至有技術阻力，短期市況，相信會係大漲小回局面。
長和同地產股繼續領漲，昨日介紹嘅地產股Call輪都有進帳。不過，呢幾隻股份已經好超買，以9RSI計，長實（001）去到87，和黃（013）更達88，新地（016）亦有82，回吐隨時出現。恒指本身嘅9RSI高見84，就算睇好後市，亦無謂心急追佢哋嘅Call輪。
唔追Call輪唔代表應該揸Put輪，照個勢睇，港股就算有調整，幅度亦唔會大，買Put輪博調整唔化算，不如等個市回番多少，再買長和同新地Call輪。想即時上車嘅，可以考慮滙豐Call輪9845同中移動Call輪9861，因為正股落後，重有水位。
資金冇出路，唔少人搵落後股炒，老牌紅籌係對象之一。華潤創業（291）是日急升9%，帶動4件華創輪打入龍虎榜。4件當中，9011唔係標準輪，9270係末日輪，一般人未必啱玩。餘下兩件，9721溢價0.2%，槓桿率8.2倍，玩到10月尾；9868平水，槓桿率5.6倍，12月下旬屆滿。兩件比較9868稍為佔先，但正股升得急，不妨等吓至郁手。
章盛