四十歲係成年嘅一個里程碑，所以美國《財富》雜誌每年都列出四十位四十歲以下嘅億萬富豪，重分為美國本土同美國以外地區兩大類別，八方噚日收到最新一期嘅《財富》雜誌，美國以外地區嘅年輕富豪榜，榜首就係國際球壇近期嘅風頭躉、英國超級聯賽球會車路士班主阿巴莫域治（RomanAbramovich）。
呢位下個月至滿三十七歲嘅俄羅斯第二首富，以石油同投資致富，目前身家估計達六百四十七億元。佢五月入主車路士球隊，噚日「車仔」再獲皇家馬德里中場馬基里尼加盟，亦係呢支球隊今夏第十二次收購，涉及嘅轉會費達一億英鎊（折合十二億二千四百萬港元），手筆之大，可說歷來僅見。
除咗「阿巴」，另外重有四位俄羅斯富豪列入十大之內，可見世界財富嘅轉變。香港只有一人入榜，就係電盈主席李澤楷，佢以五十八億元名列第十七，比較去年嘅第十位又降七級；中國富豪榜就有六名入榜，排名最高嘅網易創辦人丁磊，身家估計為六十四億元，較小小超更多。其他上榜嘅中國富豪包括通威總裁劉漢元、比亞迪總裁王傳福、上海復星集團董事長郭廣昌、鵬潤集團董事長黃光裕等。
傳真︰2623-9278
電郵︰