呢輪福士代理中人可謂忙個不停，皆因早前運嚟嘅「甲蟲」開篷版，以及新一代SUV嘅Touareg3.2型號，均有唔錯嘅口碑及銷量，繼後又因為新款第5代Golf面世在即，代理為咗及早清貨，以其極吸引兼唔到14萬起嘅車價，開售現有Golf車系，令一眾Fans興奮莫名之餘，並同時將銷售額推高。然而，最近亞Mark聽聞，Touareg至頂級嘅4.2V8型號亦經已運抵香港，兼且重陸續交赴人客手中；響一眾同級歐、日SUV嘅環伺下，Touareg有咁好成績，相信代理都可算飲得杯落喇！至於話同系嘅Touareg5.0公升柴油版，由於近日有唔少另類愛好者有興趣，若然有人唔嫌棄封尾窗作貨車類出牌的話，代理都會為客人訂車㗎！咪以為柴油車Cheap噃！事關呢部Touareg用嘅係一台5.0公升V10柴油偈，馬力直迫電油版4.2公升V8型號，除有成313匹輸出外，扭力響2000rpm低轉下，重可以做出76.5kgm高峯值，而0至100公里加速重係同系至快，只係7.8秒咋！而車價就要成90萬上落喇！有興趣嘅朋友，不妨向代理查詢吓喇！