飲食人誌：清新健康食香薰落肚

香薰都食得落肚？唔係亂講，日日點香薰油浸香薰浴嘅Kate，沉醉香薰帶嚟嘅清香及健康效益，深入研究過之後發現外國人會將香薰油加入菜式當中，於是向法國嘅香薰油製造商攞資料，再找來大廚一齊鑽研，創製出一系列香薰菜式。

記者：馬慶武
攝影：周旭文

■地方唔算好大，只可同時間容納20多人，記得預約。

■Harry重會即場邀請客人親身體驗一下烹調過程。

Kate愛香薰亦愛烹飪，卻從來未想過將兩件事撈埋，直至知道法國人將香薰油用於煮食，於是便與擔任大廚兼教烹飪嘅Harry研究，將合適嘅香薰油加進菜式當中，令菜式更香更健康。

不同香薰配合不同材料
Kate話：「不同菜式加入不同香薰油，效果都唔同，我同Harry研究出嚟呢個菜譜，朋友試過都讚不絕口。食後真係輕鬆啲開心啲。」曾經喺西宮、富麗華工作過的Harry補充說：「不過唔係求其落隻香薰油就話係香薰菜，菜式同香薰油嘅味道要夾。」

食落肚最緊要醇度高
她表示並非所有香薰油都食。「用之前都問過香薰油製造商嘅意見，證明呢幾款香薰油醇度達到標準先加入食物中。」Harry亦話加香薰油嘅時間要好準，香薰油揮發得好快，太早加，上枱時會無晒香味。

■Kate話薰衣草有幫助消化嘅效用，加入甜品當中就最啱。

香薰油：檸檬
蘆笋雞卷配番茄沙沙汁
一啖咬落呢件蘆笋雞卷，感覺到嘅除咗係雞肉嘅嫩滑同蘆笋嘅爽口外，重散發一陣獨特檸檬香薰。最後記得試埋HarryHomeMade，用嚟伴碟嘅番茄乾，覺得好味重可以即場請教Harry，佢會詳盡解釋製作方法。

香薰油：柑橘
法式白朱古力慕絲
朱古力慕絲軟滑香甜，加上柑橘香味，感覺清新好多。雖然慕絲甜味頗濃，但食完都唔會覺得「漏」。

香薰油：西柚
西柚大蝦沙律
主要材料有大蝦、靈芝菇及雜菜，加入1至2滴西柚香薰，嗅覺都感受到醒胃感覺。據講西柚香薰油更含有氨基酸，有助對腦部發展㖭。

田園鮮茄野菌清湯
因為係清湯，所以唔適合加入經提煉嘅香薰油。用番茄、野菌為湯料，採訪當日Harry就即場示範製法，用料及製作過程都非常簡單，學識之後喺屋企一樣做到。

食客兩句
好香好清新
Amina：「我一向都有點香薰同浸香薰浴，但食落肚就係第一次，感覺好香好清新。廚師重會出嚟教埋你點整，真係學到嘢。」

有新鮮感
Jeannie：「落咗香薰嘅菜式更有特色，好有新鮮感。如果喺不同季節用不同嘅香薰油襯番有季節性嘅菜式，咁就最Perfect喇。」

木馬會
地址：中環皇后大道中54號至56號豐樂行1樓
電話：31023211
價錢：每位$385加一(4道菜、烹飪教學、餐酒試飲會)
晚餐供應時間：
6:30pm-9:30pm（須預訂）