消費BestBuy：<br>今年中秋玩風扇轉出64變

新一代的中秋燈籠，不再是摺紙點蠟燭，取而代之的是吹氣公仔加電燈膽，以及集閃燈和動力於一身的騎呢款式，打正旗號的有鹹蛋超人和長青的哈囉吉蒂，長賣長有；有盜版之嫌的《海底奇兵》是今年大熱，不乏Fans；燈籠花款之多，由一歲BB至俏媽咪都有心頭好。如今的「燈籠」除了用燈唔用蠟燭外，重變化多端到──連一把風扇都可以係「燈籠」！

記者：楊一凡
攝影：楊錦文

海綿扇面唔𠝹手
Max媽咪：「抱住佢好重好熱㗎，所以我先買個風扇吹吓，大家都無咁熱嘛，扇葉係海綿，就算小朋友碰到，亦不會𠝹親手；扇面閃燈更有64變，幾玄吖，好似易經64卦。」（$38/c）
Max手上的伸縮激光劍，在手柄位發光，一歲的Max仔輕力一拋，就馬上伸長，輕身又方便。（$8/a）

戴着斜帽，露出小蠻腰的金髮女郎，只要一通電，就曉自己拚命轉呼拉圈，自問面對中秋月餅，無乜自制能力的健美小姐，不妨買個警惕自己。($20/b)

「我本身買咗『魚仔電影』嘅燈籠，不過睇完港姐，又鍾意咗閃石皇冠和權杖，雖然唔係好似平時啲燈籠咁，但中秋節夜晚出去玩時，會好閃好搶眼，同埋好靚。」($15/b)

■風扇其中一塊扇葉上有五點閃燈，圖案由此變化出來。

《海底奇兵》燈籠是盜版？
賣到成行成巿的魚仔燈籠，惹來迪士尼香港區消費品事務組正視坊間售賣的燈籠。是授權還是盜版。其實燈籠背後大大個生產商電話印喺度，做老翻真係敢做得咁揚？記者就此，致電跟印在《海底奇兵》燈籠的香港火炭生產商提問版權一事，負責人表示，只是客人覺得那些款式的燈籠「似」電影主角，生產商在包裝上並沒有標明是電影公仔。即係話佢「係《海底奇兵》燈籠」都係大家對號入座，其實佢哋只係小丑魚燈籠，咪寃枉好人。所以話香港人市場觸覺強，識變通，香港人又點會認輸！

卡通公仔類

■短小的勁閃棒$8，可變出八個花式，這是Max仔的夜用燈籠。

子均爸爸：「子均最鍾意HelloKitty公仔，成屋都係㗎，今年隻Kitty加咗對翼，唔同咗，又要一隻雙魚座燈籠係佢個星座嘛。」($29/a)

阿靖：「我唔鍾意魚吖，鹹蛋超人威風同埋Man啲，我屋企重有多兩款超人燈籠。一開出來，重有音樂聲。幾好聽」($15/a)

（a）金輝玩具（28913555）
灣仔太原街14號地下
（b）旺角花園街街市燈籠攤檔
（c）KidsHouseLimited（31880350）
觀塘觀塘道396號毅力工業大廈地舖D2

繼紙魚及白兔之後，今年設計成熱氣球的紙燈籠是至受歡迎的新款，細孖說：「前年爸爸帶咗我哋去新西蘭玩嘛，我哋成家人坐過熱氣球，所以我唔買公仔款，呢個熱氣球款特別啲，出街未試過同人撞款。」($15/a)

「雖然我都好鍾意《海底奇兵》，但報紙話唔知迪士尼授咗權去出燈籠未，所以我轉咗買紙做的魚形燈籠，都係魚，幾可愛吖。」($7條/a)

消費BestBuy：今年中秋玩風扇轉出64變

消費BestBuy：
今年中秋玩風扇轉出64變