男子組合Shine呢排得到法國品牌Chevignon睇中，除咗贊助佢哋嘅便服外，近排重特登別喺新出嘅ReworkDenim系列牛仔褲嘅臀部度，繡上Shine個名，所以條褲，喺巿面上係買唔到嘅。
唔知Shine嘅徐天佑，會唔會幫緋聞女友Cookies嘅Miki問Chevignon攞多一條呢？不過馮仁昭覺得天佑要記緊唔好幫Miki攞條繡咗名嘅牛仔裙或者熱褲，因為Miki近排喺公開活動時大跳勁舞，搞到成日春光乍洩，所以應該幫Miki拎條牛仔長褲，咁佢下次幾大動作都萬無一失啦。
講番Shine呢條牛仔褲，原來專登空運返法國加工，Chevignon送呢條牛仔褲畀佢哋，主要係想將歐洲興DIY嘅潮流訊息帶返香港，天佑噚日喺電話度話：「我對DIY都好有興趣，但平時工作太忙，我好鍾意着牛仔褲，貪佢夠晒方便同襟着。」
溫碧霞早前去咗峇里島拍寫真，Irene話呢本寫真會主攻內地市場，Irene一向都好性感，咁本寫真都應該有唔少嘢睇啦，但係佢竟然話：「都係健康嘅性感，最性感都係三點式。」原來三點式都唔算好性感，Irene嘅尺度真係與別不同！佢重話遲啲會拍一套由內地投資嘅《火玫瑰》續集，相信到時Irene會以經典「海潮」Look出現。
王從希噚日去新城電台接受訪問，問佢會唔會同無綫簽合約？佢話：「其實無綫合約嘅條件都好好。」但有傳佢父母都反對佢入娛樂圈，王從希話：「其實佢哋冇話反對同贊成，但我自己就想留低發展。我認為我自己應該可以應付得到，我想畀幾年時間自己喺圈入面玩吓。」其實王從希一出道就同雜誌影過性感相，點會應付唔到？
由張家輝、朱茵及吳鎮宇主演嘅電影《心寒》原本喺噚晚舉行首映，點知因為颱風杜鵑，搞到連首映都要取消，之前呢套戲已經話因為海報太恐怖被禁，啲演員咁辛苦先度到期做首映禮，點知又要改期，乜嘢都好似唔係好順利咁，連朱茵都話：「可能套戲猛得滯，搞乜都有阻滯。」咁咪啱晒囉，唔係邊有宣傳效果呀！
戴辛尉噚日去新城電台做訪問，噚日掛八號風球，搞到佢嘅工作都受到影響，不過取消工作一啲都冇影響佢嘅心情，戴辛尉重好興奮咁話：「咁我可以約人打麻雀，打風球最好就係打麻雀，我最高紀錄試過打三十六圈，打完後我連鏡都唔敢照，怕見到自己個樣嘛。」佢嘅雀友除咗佢家姐之外，重有江欣燕㖭。
陳慧嫻同關心妍係兩代玉女歌手，日前一齊喺電視城為佢哋嘅合唱新歌《拈花惹草》拍MV。雖然拍MV嗰日，關心妍啱啱喺美國返嚟，一落機就要即刻開工，但身為慧嫻fans嘅佢就毫無倦意，點都趕一趕返屋企，攞晒慧嫻啲黑膠碟畀偶像簽名，跟住佢又要同慧嫻影合照，行徑同小fans真係無乜分別！
