杜鵑襲港，來勢洶洶，不過上海姑爺羅康瑞旗下嘅瑞安建業，噚日下午三點舉行嘅股東周年大會，即使八號風球高懸，仍堅持唔改期。
八方問羅康瑞點解咁博，佢話自己經常穿梭中港兩地，若然股東會唔如期舉行，都唔知幾時先就啱時間，所以佢噚日一早打電話去問交易所，究竟八號風球之下股東會可否如期舉行，交易所嘅答案係：「冇問題」。
股東會照開，冒住風雨出席嘅股東亦唔少。散會後，羅康瑞急急腳走，八方問佢係咪怕打風，點知佢同八方講要返公司開會，因為約咗內地同美國嘅同事開電話會議，所以一眾管理層都要返公司。咁其他職員呢？「當然放咗工啦，我唔會咁唔合理嘅。我係對自己唔合理啫。」
（圖）羅康瑞（右）話如果噚日唔開股東會，就唔知要等到幾時。
傳真︰2623-9278
電郵︰